市場憧憬美國息口見頂，大部份地產股呢幾個月表現相當標青，唔少人以為做物業代理嘅美聯集團（1200）可以共富貴，偏偏事與願違。隻股喺3月頭自5.25元高位回落，6月中跌到3.075元低位後，跟隨地產股反彈，可惜8月頭已經腳軟，上個禮拜初好似有啲勢，點知係虛火，上星期五逆市跌3格，收報3.38元。
女人網「she.com」留言板內，網友James問：「𠵱家股價相對唔算高，息口就嚟見頂，呢隻股有冇得炒？」網友叮叮蟹就提醒佢：「早排見有基金不斷出貨，買唔買得過你自己諗啦。」
叮叮蟹所指嘅基金正係凱萬資產管理，呢間美資基金今年3月時最多揸近12%美聯股權，後來見息口未見頂，於是係咁沽，基金未沽完，隻股暫時冇運行。
圖表走勢方面，美聯上星期曾升破保歷加通道中軸，可惜去到3.58元已經乏力再上，9RSI跌回50之下，MACD喺0線之下糾纏，平均線組合亦顯示軟弱無力，睇嚟短線向下多過向上。
美聯3蚊呢個支持位唔可以失守，因為由去年11月至今年6月所形成的上升趨勢線，支持位大約在3蚊，若然跌穿埋呢條升軌，相信有排跌。