打星罐頭湯個大仔「等日出」早排同人夾份投資開酒吧，但呢間吧係行會員制嘅超級鐵竇，基本上全部都係等日出同其他股東嘅朋友落嚟幫襯，會員要按密碼至入得，生面口嘅就會被捉埋一邊，要講得出邊個係介紹人至肯做你生意。但點解做生意都要搞到咁鬼祟呢？關仁聽聞除咗因為等日出搵埋唔少奀星蒲友打躉，驚俾啲生客見到佢哋墮落一面之外，最重要係唔少客人會喺酒吧公然「食嘢開餐」，萬一遇到差佬放蛇實死梗，所以至搞到間酒吧銅牆鐵壁。
歌仙唔騷大佬
歌仙個大佬痰罐早幾個月嫁女，歌仙冇出現，激到痰罐生蝦咁跳，之不過痰罐今個月娶新抱，佢都循例邀請細佬出席，話晒大家一場兄弟吖。不過，關仁聽聞痰罐仲嬲緊歌仙唔嚟飲喜酒單嘢，所以今次冇親自打電話畀歌仙，而係叫老婆打電話通知歌仙老婆，連電話都唔想同歌仙講多句。聽聞歌仙又再以工作理由推咗痰罐，話唔去飲，做兄弟做成咁，相信佢哋阿媽知道一定好傷心。
醫生喜怒無常
醫生份人情緒化就係人都知，但估唔到佢居然喺一個鐘頭之內，情緒南轅北轍。早排佢出席記者會，當佢喺台上講嘢時，見到台下有記者細細聲同隔籬個人傾偈，人哋講咗兩句，醫生覺得唔受尊重，竟然當眾喝止，唔止個記者唔敢出聲，全場嘅人都靜晒。點知醫生發言完畢，接受記者訪問時，佢又變得超開朗，仲講晒笑咁，心情180°轉變。心情轉變咁大，唔知係咪情緒病嘅一種呢？
Textby關仁