香港國際保齡球公開賽前晚喺南華會舉行，娛樂圈中熱愛保齡球藝人都組隊參加，競逐「演藝人挑戰盃」，一輪激戰後，由華仔率領嘅AllStarTeam以大熱姿態得冠軍，亞軍就由電視廣播有限公司獲得，季軍就係藝進同學會。
男女一樣錫
劉德華前晚為隊伍AllStarTeam出一分力，隊員仲有黃日華、張兆輝等，引嚟數十fans到場為華仔打氣，華仔就以精湛球技回饋歌迷，當晚仲打得一連三個全中嘅佳績，現場即時報上歡呼聲，華仔都好興奮咁同隊友擊掌。
電視廣播有限公司代表就有吳家樂、鄧兆尊、李逸朗等，吳家樂仲同華仔一樣打得連續三次全中成績，佢太太周蕙蕙身懷六甲，仍然傍實老公打氣，吳家樂一得閒就坐喺太太側邊，離開時仲十指緊扣。吳家樂話𠵱家已經減少海外工作，至於BB係男係女，佢就話：「我哋冇刻意要知道，但有去檢查，最緊要健康，男女都一樣咁愛錫。」
另外，噚日喺屯門舉行咗「仁愛慈善保齡球賽2006」，吸引圈中保齡球愛好者組隊參加。繼前晚於南華會比賽獲冠軍後，華仔噚日表現平穩，同余錦遠及好友組成嘅關懷隊奪得亞軍，較港隊成員組成嘅冠軍隊只係少52分。賽事後華仔擔任導師教打波，仲笑好兄弟苗僑偉未瞓醒而大失水準。
對於恩師梁中昀車禍身亡，華仔說：「我噚晚（前晚）比賽完收到消息好唔開心，老師離開咗學校一段日子，我記憶中佢有啲白頭髮，幾有型。」
