日前自由黨阿頭田北俊話勞工界鼓勵市民申領綜援，係會破壞社會和諧，工聯會嘅嫻姐陳婉嫻噚日反問：若果啲低下層生活唔好，社會又點會和諧？佢仲話識好多開明嘅工商界人士，都認為要過得人過得自己，唔會刻薄啲員工；惟獨一啲頑固嘅工商界就唔係咁講法，說話似乎向住田少猛衝過嚟。
嫻姐又話，好多勞苦大眾都好有骨氣，想撐落去，唔想攞綜援，但係睇見佢哋工時長人工少，做到五勞七傷，確係唔撐得幾耐，不如叫收入低過綜援嘅勞工去攞綜援好過。佢仲話政府應該帶頭定保障政策，但如果政府詐懵，就惟有號召社會運動，去話畀人聽佢哋好辛苦。
此外，八方問嫻姐前排煲呔有冇為私底下叫工聯會三子係「福祿壽」嘅事道歉，佢就嬲爆爆咁話，從未收過煲呔嘅任何道歉訊息，又話對呢個人見怪不怪，冇乜期望。