今時今日，男歡女愛好正常，離婚男女都一樣！近期忙緊宣傳新片《大丈夫2》嘅謝寧，舊年10月同岑建勳宣布結束15年婚姻，謝寧話因為老公太高高在上，不解溫柔，而自己係小鳥依人類型，所以性格唔啱要離婚。
男友貌似鍾鎮濤
事隔一年，原來謝寧已經火速搵到新歡，仲一齊恩愛外遊㖭。噚日朝早7點幾，便裝牛仔褲打扮嘅謝寧同戴眼鏡嘅中年男子，喺機場港龍櫃枱辦理登機手續，準備飛往內地。呢位男士高謝寧一個頭，大約5呎9吋，頭髮濃密兼且有幾分似阿B鍾鎮濤，樣貌絕對唔失禮。佢兩個一直有講有笑，謝寧望住男友嘅眼光都不知幾咁柔情，又不時摸男友手臂，又細心咁幫佢托吓眼鏡，九成九係熱戀之中。後來謝寧發現有人影相，不過佢都懶得理，仲成個頭挨落男友度，笑住入閘登機，一啲都唔介意新男友曝光。嗱，呢啲咪叫大方囉！
