「我覺得胡比高拔（WhoopiGoldberg）個樣同我好似，好多人對優生學有誤解，新加坡有人研究過其實正正係得負，咁計嘅話，可能我哋個BB會好靚。我幾鍾意黑人，因為佢哋好有活力，話唔定個BB會跳住hiphop、『Yo』住咁叫我爹哋，幾咁正呀！」
對象：胡比高拔
古巨基生多兩個
「全智賢個樣畀人一種好自然舒服嘅感覺，起碼我覺得佢冇經過後天加工。而且個BB出世之後，我一定唔擔心自己戴綠帽先，因為如果老婆個樣係經過後期加工，生出嚟個BB唔會似佢加工完個樣㗎，到時咪會有綠帽疑雲囉！同埋以全智賢咁優質嘅女仔，我當然想生夠一仔一女啦！」
對象：全智賢
陳小春人棄我取
「畢彼特唔識欣賞佢前妻珍妮花雅麗絲頓（JenniferAniston），但係我識，我睇《老友記》（Friends）已經好鍾意佢，覺得佢真係好charming，好有味道，一個字——『正』。如果真係有得同佢生BB嘅話，我唔介意啲仔女個樣都似晒佢呀，畀我娶到佢，畀晒身家財產佢都願呀！」
對象：珍妮花雅麗絲頓
張致恆親切加分
「我最想同《魔盜王》（PiratesoftheCaribbean：TheCurseoftheBlackPearl）女主角姬拉麗莉（KeiraKnightley）結婚，佢之前做《我愛碧咸》已經鍾意佢，我覺得佢演技又好有性格，同埋佢好親民㗎，不過我最鍾意佢成日同細路仔玩，因為我都好鍾意小朋友。」
對象：姬拉麗莉
蔡卓妍遺傳眼神
「我覺得曉格蘭特（HughGrant）除咗做戲好之外，佢對眼好似識講嘢，我諗同佢一齊應該會好開心，覺得佢個人都幾浪漫，所以同佢生BB都會好開心。如果個BB好似佢咁都唔錯，對眼識講嘢喎，迷倒幾多人呀。」
對象：曉格蘭特
活己嵐精挑壯男
「我揀同阿Rain生BB係因為我本身好鍾意韓國男仔，另外就係我偏好一啲大隻仔。阿Rain跳舞咁叻，我諗個BB仔一定都會遺傳到爸爸呢啲因子，而且大個咗身形都可能會一樣咁弗。最重要係阿Rain嘅單眼皮真係好可愛，所以我最想個BB對眼似佢，咁一定會好得人鍾意。」
對象：韓國藝人Rain
吳日言生仔搵錢
「碧咸（DavidBeckham）真係靚仔人辦，而且又有錢。至於我想同佢生BB，除咗因為佢靚仔，同佢嘅結晶品一定遺傳到佢嘅運動細胞，他日長大成人都會成為出色嘅運動員，又可以搵好多錢。碧咸退休我都仲有啲仔女搵錢，到時要我一年生一個，生夠一隊足球隊我都願呀！」
對象：碧咸
戚黛黛酷男可親
「我最鍾意嘅外國男明星就係奇洛李維斯（KeanuReeves），佢做《生死時速》（Speed）嗰陣已經覺得佢好型。我對man嘅男士特別有好感，加上佢又高又大隻，同埋coolcool哋咁就啱晒我啦，口花花同扮晒幽默嗰啲我反而唔鍾意。」
對象：奇洛李維斯
採訪：胡比、藍文浩、李珮洳
