好多人對結婚戒指珍而重之，認為係對另一半一生一世嘅盟約。好似何俊仁受襲後第一件事就係要搵番隻結婚戒指，但經常喺傳媒面前同老婆大晒恩愛嘅Ronny湯家驊，對自己嘅結婚戒指就一啲都唔着緊，事關佢哋兩公婆係好多年前，已經唔知對戒指擺咗去邊，佢認為不必拘泥呢啲嘢，難得佢太太又咁大方，從未詐過型。
Ronny噚日應邀出席一個商場嘅集體婚禮儀式，為求隆重其事仲專登戴咗條平時好少用嘅紅色呔。見到有成24對新人甜甜蜜蜜咁行禮，Ronny諗起自己1975年某個周六同太太喺英國伯靈頓註冊時嘅溫馨場面，佢話鑑於當時啱啱出嚟社會做事，都唔敢太鋪張，凡事都係希望簡簡單單，即使連新娘嘅花球都係太太親手用筷子同鐵線紮出嚟。諗住喺嗰邊註冊嘅原意都係為咗避開擺酒呢啲繁文縟節，點知返到香港，為咗順應老人家嘅意思，最後都要擺番酒。
30周年花裙再現
Ronny話當日自己着住套晚禮服、太太着套花裙去行禮，點知遇着個證婚人話見到佢哋兩個着到咁隆重就好興奮，因為之前佢幫十幾對新人證婚，對方都只係着T恤同牛仔褲，好難得見到佢哋對婚姻嘅尊重。
行完禮後，佢哋就同嗰班參與證婚嘅同學一齊去唐人街食飯，記得當晚有人送咗兩箱酒，飲晒後當然係「啤啤夫」啦，唔單只嘔吐大作，仲要人扶住佢上樓，醉成咁嗰晚當然乜事都冇發生過啦。
事隔30幾年，Ronny對每一個細節都記憶猶新，咁多年嚟，雖然好多嘢都變咗，好似佢由當年一個瘦仔變為一個肥佬，但太太嘅身形咁多年都未改變過，一年前佢哋慶祝結婚30周年時，太太依然着住當年行禮件花裙。
講番呢次全港首個喺商場舉行而且具法律效力嘅集體婚禮，參加嘅新人只需畀300幾蚊政府登記費，其他一切都係由商場包辦。飄雪、煙花、紙炮等特別效果真係好似做秀咁，情意綿綿嘅情歌、甜蜜浪漫嘅說話滿場飛，新郎李偉倫以一曲《有了你》唔單只娶得陳詠思，仲得到大會情深說話大獎。