浸會大學近九龍塘，都叫做喺市區，聽落好方便，搵食唔難啩？傳理系3年級生Jamie話：「去又一城、樂富同九龍城都係差唔多時間，行街睇戲就去又一城，搵食就一定落九龍城。」邊間最捧場？「InCafe！」Jamie諗都唔使諗即答：「記得第一次同同學經過，見到有間Cafe咪撞彩入去試吓囉，點知唔覺唔覺，我哋竟然坐低傾咗5粒鐘。」
5粒鐘？我同班Friend去Cafe，Hea極都係3粒鐘咋喎，Jamie解釋：「九龍城極少Cafe，呢間全面禁煙，又唔似旺角尖嘴啲Cafe咁，周圍一班二班人喺度嘈喧巴閉，播埋晒啲難聽到嘔嘅流行曲。食飯係享受嚟㗎嘛，環境寧靜好重要。」有道理，咁食物質素呢？「多數嚟食晚餐，最正煙三文魚同麵包，食一餐$50至$60落樓，聽落比學校Canteen貴，但食同樣食物幫襯其他餐廳，我就覺得好平喇。」咁堅？我都唔執輸試試即焗藍莓酥同牛角包，我一連食咗3個，好味呀。
記者：黃若茵
攝影：陳偉強
精選麵包餐配挪威煙三文魚$32
麵包餐可配多種不同肉類，有香草包、藍莓酥、牛角包等多種麵包任你選擇，另配新鮮健康沙律菜，煙三文魚也很鮮美。
法式焗田螺$48
原裝入口法國田螺，並非殼肉分離嘅次貨，加香草原隻烤焗，螺肉爽脆唔韌，鹹咗啲，食埋伴碟薯茸最Goodfit。
薄荷汁新西蘭羊扒$78
Setdinner之一，用多種香料調校薄荷汁，煎焗後仍保持大量肉汁。食落唔羶，慢慢咬食到好香肉味。
InCafe（23836800）
地址：九龍城福佬村道71號地下