上周三晚法國終可一雪世界盃前恥，打敗意大利。嗰場波法國真係踢得好好，尤其防守方面，失嗰球都係輸死球戰術。施丹係我偶像，世界盃法國12碼輸波，我覺得好唔抵㗎，𠵱家由佢班隊友幫佢贏番，我條氣先至順番啲。
歐洲賽事重開，其實每隊嘅季前目標，都係博聯賽前列，以獲得歐洲賽事入場券。之但係歐洲賽就唔係一般球隊可以應付，最基本要有足夠兵力。大家都應該記得上屆貝廸斯，歐冠盃同聯賽兩頭唔到岸，有段時間仲弊到聯賽徘徊響護級邊緣㖭！阿仙奴上季都係因為太專注歐冠盃，加上兵力唔足，搞到要用法米尼踢左閘，聯賽成績唔多唔少因而被拖累，幾經艱苦先攞番個英超第4名。
曼聯漢堡有危機
我覺得今屆都有名牌隊伍有咁嘅危機，好似漢堡同埋我愛隊曼聯，名就夠響但人腳一般。曼聯今季只係買咗卡域克同古斯錫，前鋒線亦唔夠人，都唔明點解冠軍賠率有成11倍咁熱，作為fans嘅我都唔睇好。無咁大個頭，戴唔起呢頂帽㗎！
WENDY
由歐國盃EuroBabes，變身球彩台受歡迎主持。