聽過《海神號》呢個名，起初仲以為又係《鐵達尼號》式災難片結合愛情元素，極公式化嗰隻！點知，睇完片頭十幾分鐘，由巨浪吞噬郵輪嗰一幕開始，先知道係另一回事！《海神號》特別以震撼嘅電腦CG作招牌，例如郵輪被捲入海底，百幾條人命喺船艙被拋嚟拋去等，統統活現眼前；DVD版更加插災難大起底片段，恍如睇紀錄片咁真實！
記者：陳國輝
類型：災難
片長：98分鐘
字幕：中、英
售價：$188（DVD）/$58（VCD）
查詢：華納（31281791）
場景製作逼真！
講場景，今集已達到超逼真效果，DVD版仲加料放送電腦特技製作花絮，俾你慢慢欣賞。究竟裏面有幾多成由CG做出嚟？即睇！
船身反轉嗰幕，咪睇啲演員好似波咁被拋嚟拋去，喺實景已加晒厚墊，而且由一個活動式舞台控制。
巨浪衝入大廳一刻，演員被撞至彈上天花板，超震撼，但於實景拍攝時其實已吊好「威吔」，兼用咗唔同燈光效果。
《海神號》導致鐵達尼號沉沒？
喺電影史上，原來《海神號》（之前叫《海神號遇險記》）已經拍過3次，第一次仲發生鮮為人知嘅傳聞。據講，於1912年首播嘅默片版本，正好就係鐵達尼號沉沒年份；更湊巧係，當鐵達尼號正在沉沒之際，二等艙乘客還欣賞緊呢套片，一直被蒙在鼓裏；假如傳聞冇錯，話唔定引致一千多人死亡嘅鐵達尼號大災難，或多或少跟《海神號》有關。
特技玩足98分鐘
基於兩齣戲都由海上沉船災難為起點，所以難免有啲比較。記得《鐵達尼號》喺最後船身向上傾斜，然後垂直90o再沉落大海嗰幕，就玩上大量CG元素；但係《海神號》玩得更徹底，佢由片頭十幾分鐘直至結局，不斷勁Sell電腦特技，而最令人難忘嗰幕，可算係百尺高巨浪出現嗰一剎那，情況有如千軍萬馬直衝郵輪，然後迅速捲入海底，嗰段戲逼真程度簡直爆晒燈，如果用埋超闊LCDTV加部5.1Hi-Fi嚟欣賞，相信壓迫感肯定唔只咁少！
論特技，查實《海神號》仲有唔少爆炸及巨浪襲擊等壯觀場面，全程98分鐘包保唔會有悶場，但講到劇情，好多睇過1972年齣《海神號遇險記》嘅朋友都話，嫌今集唔夠人性化，而且節奏太快，好似想嗱嗱臨收工咁款。無疑故事係簡單咗啲，但為咗欣賞超靚CG特技都值得嘅！
喪昅噴血身材！
露溝益老竇
噴血度：★★★★★
老竇賭緊錢，阿女突然走埋嚟傾偈，仲不經意彎低身露出乳溝㖭！
水底肉蝴蝶
噴血度：★★★☆☆
逃生仍不忘Show本錢，雙手撥水時件衫仲甩甩吓，可惜水質唔夠清！
B碟解剖大災難
講起BonusTracks部份，呢套DVD總算落咗唔少工夫，孖碟包裝設計雖則稍為單調，但好彩B碟裝滿大量幕後製作花絮、航海誌、拍攝經驗、特技效果剖析、船員日誌以及刪剪片段等內容。當中最值得大家欣賞，首選必睇巨浪災難大起底，佢唔單只帶你回顧過去多宗郵輪沉沒嘅迷團，仲會訪問多名地理學家，由佢哋向你解釋大災難嘅因由，仲會做埋小實驗，認真到不得了；另外，又會搵埋歷史學家求證，講述大海的確發生過幾次巨浪吞噬船隻嘅事實，似乎想話畀大家知，《海神號》雖然唔係真人真事，但類似嘅事件仍會發生。
