永嘉上市，股價即日升咗三成，經紀K問左丁山有冇認購，答之曰：「冇。」近來對每每超額認購一百倍或以上嘅新股，已失興趣。因為即使申請得到一手，唔慌賺得多，經紀K話永嘉受歡迎，不妨諗諗李寧，兩家公司都係以體育運動衣為主要業務，李寧早上市，知名度較高，李寧個人出名唔在講，李寧在國際市場開始打響知名度，與NBA巨星奧尼爾簽咗五年贊助合約，雖然奧尼爾已經開始老退，但畢竟名氣大，食老本都有排食，可以增加美國人對李寧嘅認識。此外，西班牙贏咗世界籃球錦標賽，成為世界冠軍，穩奪○八年北京奧運籃球賽入場券，對李寧係一個天大喜訊，因為西班牙國家籃球隊喺二○○四年與李寧簽咗四年贊助合約，到咗○八年，西班牙隊係奧運籃球嘅熱門冠軍隊伍，在北京打波，穿李寧產品，宣傳價值夠大喇啩！
經紀K講咗咁多嘢，左丁山仍然十五十六，自己生性保守甚為膽細，對內地民企嘅公司管治，始終認為要謹慎研究。譬如「富士康」呢個台灣民企，聽日加入恒生指數成份股，成為藍籌，股價已經升咗幾倍。但左丁山唔願意沾手。「富士康」集團在內地初初俾媒體抨擊，唔去告媒體，竟然只係控告記者，受圍攻之下，先至退讓。呢間公司嘅管理層或董事會嘅作風似乎十分有霸氣，咪等佢威到盡囉。
做大生意做到似皇帝，當傳媒死嘅，是否有利於股價呢？好難講，喺現代社會，政府、企業必須與傳媒共存，唔可以專橫。大老闆唔喜歡傳媒，可以保持低調，派公關人員去溝通，如果吓吓都話告記者而未必告傳媒，長期嚟講，股價容易俾人唱衰。
不過公關千祈唔好狐假虎威，揸住雞毛當令箭喎，最近聽到一位公關大員代表公司出席一啲捐款會議，會上最多聲氣，令到接受捐款嘅機構嘅老人家幾乎忍唔住要同佢鬥嘴。呢啲公關就係倒老闆米嘅典型，將好事變成壞事，影響公司聲譽。