全球只得3部的936萬元天價手機，香港人都願意消費，一擲千金穿一件數十萬元、onenightonly華衣的富太，更大有人在。多年來站穩城中首席「名媛設計師」寶座的鄭兆良（BarneyCheng），遇過不少要求獨特刁鑽、令他大開眼界的客人，他認為「人上人」有她們的要求，要與別不同，成為全場之冠，實屬十分正常，他絕對不會怕煩。撰文：梁錦雯
近年香港時裝界離不開的hothittalk是國際時裝品牌鬥插旗，開店鬥大、鬥豪，派對鬥勁……客觀地反映名牌效應需求熾熱，有人可以豪花936萬元買鑲滿鑽石的天價手機，又有人寧願花百多萬元買件由老佛爺KarlLagerfeld設計獨一無二的Chanel高級訂做服，都是講究奢華氣派的課題。若要數與奢華氣派有關的香港時裝設計師，鄭兆良絕對是這個媚外名利場的生還者，更揚名國際。
鄭兆良能夠令名人巨星將他們「一生最重要的一刻」的重任交託給他，而不是挑選信心保證的國際名牌，確實有他的本事，當中包括為鞏俐設計出嫁衣裳，以及楊紫瓊出戰奧斯卡的「臥虎藏龍」旗袍戰衣。不少富豪名媛甘願成為他長長waitinglist的客人之一，他比GiorgioArmani更早在中環滙豐總行開騷，與美籍華裔設計師VivienneTam一同在美國華盛頓舉行展覽，不便公開姓名的富豪客人也穿他的設計於美國白宮出席晚宴，威水史簡直多不勝數。
了解人上人
不少本地時裝設計師都透露不愛做高級訂做服生意，而鄭兆良人所共知的強項就是高級訂做服，不少人覺得性格爽朗的他，圓滑的交際手腕是其成功之道，他一語道破說：「佢哋唔鍾意做Couture，因為怕煩，其實係講緊個客對你嘅信心指數去到邊。我可以一個鐘做四個客，每個十五分鐘就搞掂，佢哋唔會問價錢，其實係要明白佢哋點解要度身訂做，因為佢哋需要嘅係與別不同。部份人係『人上人』，未必個個係非富則貴，不過會有特別要求，好似楊紫瓊去奧斯卡梗係着件好『臥虎』嘅衫，令佢自信大增；鞏俐話條裙唔可以搶過佢，唔係個個大牌子做到，所以佢哋唔係麻煩，係有原因切合需要，我明白因為我見識多，我曾經幫一個設計師做助手，去法國幫個好有錢嘅女人做衫。」
年紀大收火
鄭兆良與富豪名媛有着貼身的關係，定單絡繹不絕，問他曾否遇過奇難雜症，他笑說：「曾經試過有個客帶成『抽』人嚟做衫，結果太多意見，我就要做衰人，令佢接受我嘅觀點同角度。試過有對新人名叫Harvey同Esther，希望件婚紗有收成嘅意思，要我做一大『抽』提子喺佢胸前，呢次我真係過唔到自己，我將個客介紹畀另一個設計師；又試過設計婚紗，新郎畀咗好多意見，之後嚟試身就話新娘嘅婚紗要改尺碼，因為換咗人，都幾好笑。可能𠵱家人老咗，冇咁火爆，以前會同客嗌交，𠵱家就盡量明白佢哋嘅需要，我都覺得自己好成功。」
回顧近年本地時裝工業，在港「沉寂」多年的鄭兆良依然吃得開，他笑說：「都幾好，𠵱家外面有女版鄭兆良、男版鄭兆良、2006年鄭兆良，冇所謂，咪代表我成功，俾人抄襲係件好事，證明我嘅設計好掂。幾年前我試過喺美國，佢哋話我設計正，要re-order，我覆佢時間太短，喺意大利訂料都唔夠時間啦，結果佢哋搵咗另一個設計師抄我啲款，用內地啲料嚟車，啲錢俾人賺咗。」
攝影：陳慧安
示範：AureliaC.ofStarzPeople
型：RaymondofXenterJut（娛樂行）
化妝：SynniTamofYMCKmakeupstudio
場地：CelebrationparBarneyCheng（都爹利街一號）
