喺90年代，有好多電影都會搞午夜場首映，不過呢類活動都停搞咗近10年，前晚電影《大丈夫2》喺旺角就舉行咗個午夜場首映禮，一班演員包括曾志偉（前排中）、毛舜筠（後排左二）同黃又南（前排右）等都有出席。老闆志偉話部戲如果票房過1,000萬就會請台前幕後工作人員去泰國，過1,500萬就去日本，2,000萬就去歐洲，3,000萬就去環遊世界，包食包住仲包埋滾。
一班演員前晚喺首映禮前，去咗商台吳君如嘅節目做嘉賓，當吳君如問原子鏸同戲中一班「蛋散」拍戲唔驚影響做戲時，在旁嘅志偉即插嘴話：「我哋唔係蛋散，係爛×。」君如聽到志偉爆粗就即話「死喇！」志偉仲寸住話：「你咪停我兩個月囉。」