港姐出身嘅大眼雞，自從嫁咗又生埋之後，好似好鬼幸福咁，但其實佢老公唔只係大滾友，仲係超級軟飯王一名，屋企好多開支都係大眼雞負責。起初大眼雞以為老公屋企有啲家底，嫁咗之後唔使做，點知佢老公成日慫恿佢接job，仲話如果佢成日匿喺屋企，好容易同社會脫節，難怪大眼雞嫁咗之後仲活躍過以前。聽聞大眼雞老公之前有份高薪厚職，後來唔知衰乜俾公司炒咗，但佢就同大眼雞話做得唔開心先至唔撈。最近大眼雞又有第二胎，但佢老公仲成日去滾，雖然已經察覺到唔對路，但一直冇證冇據，咪惟有喺人前繼續扮演幸福少奶奶囉！
姊妹花臭脾造作
樂壇姊妹花組合，睇個樣好似好清純可愛，其實人前人後「四」個樣，家姐成日恃住同猩猩王傳過緋聞，以為自己真係靚爆鏡，做親嘢就擺晒款，有時仲向工作人員亂發脾氣。佢有次返老家宣傳，對住啲工作人員黑口黑面，點知連佢阿爸都睇唔過眼，當場教女，要佢向人斟茶認錯。阿妹就比較醒目，又識睇家姐頭，如果得佢一個人做嘢，就會變得好順得人，所以外間一直睇好阿妹嘅發展潛力大過佢家姐好多。
六婆刻薄空姐
六婆同佢個導演老公成日拍拖公幹，關仁有個好朋友之前咁啱同佢哋同一班機，仲要坐得好近。佢話六婆恃住自己有少少知名度，同埋又係導演嘅另一半，對啲空姐態度極差，粗聲粗氣，反而佢身邊嘅老公就鬼咁好禮貌，空姐攞嘢畀佢都例必唔該前唔該後。關仁覺得六婆身為藝人，係人都認得佢個嘜頭啦，佢應該要謙虛啲，如果唔係盞整臭自己個朵。
Textby關仁