港府諮詢開徵銷售稅不得民心，財爺為此傷透腦筋，他心底有甚麼感受呢？網友近日發現一個由「糖糖」撰寫的網誌，執筆Blogger聲稱網誌「係我亞糖糖記錄推GST半年的心路歷程」，但強調由於涉及大量政府機密，故把真名刪去換上杜撰名稱，更表明「如有雷同，實屬不幸。」
提及高層權鬥內幕
網誌是否高官真情大披露，要由讀者判斷，最新一篇文章提到推銷過程好辛酸，「次次講完嘢都要澄清，搞到我好似唔識講廣東話咁。」糖糖又在網誌中承認，諮詢過程唔順利，「成個勢都唔順，除咗唔知點解會安排咗去探單親家庭，我都冇機會講GST，搞嚟做乜？唔通我同佢哋講：『你哋唔使驚，我一定會加番啲綜援畀你哋，有GST，你哋都唔會餓親㗎（肚餓咪食燕窩囉，阿娘好少食飯，佢餐餐都食）。』你估我有無咁蠢吖嗱?」
糖糖仲話一直想做特首，提及高層權鬥內幕，「呢個咁嘅保安局，今日走出嚟話開放禁區，有四分一個香港島咁大，唉，多咗咁多地可以賣，你叫我點推GST？點解係都要今日講？等多幾個月會死咩！又係『煲煲』跣我？」對於上述網誌內容，財政司司長辦公室發言人表示不予置評。糖糖網誌： http://tongtonghenry.blogspot.com/