被上司鬧絕對唔好受，但喺大銀幕前睇人被惡魔老闆糟質，再加上出現大量名設計師、名牌衫褲手袋鞋襪，又實在係另一種過癮滋味，難怪呢期個個OL同時裝潮人，都爭住話要入場睇梅麗史翠普（MerylStreep）點樣喺《穿PRADA的惡魔》（TheDevilWearsPrada）入面折磨安妮夏菲慧（AnneHathaway）。撰文：戶川淳
今個星期四上畫嘅《穿PRADA的惡魔》，雖然原著小說以《VOGUE》總編輯AnnaWintour做影射藍本，講潮流教祖如何為工作放棄一切，不過電影版有更多篇幅放喺描述惡女上司點樣虐待下屬。
突破性扮惡人
向來好戲嘅梅麗姨，今次突破性扮演嗰種一個眼神已教人不寒而慄嘅時裝雜誌《Runway》魔鬼女總編，身為新助手嘅安妮唔只要幫老佛爺斟茶遞水，仲要連女魔頭嘅家庭事務都要做埋，情節同對白一樣夠晒絕核抵死!
其實套片主線係安妮扮演潮人眼中「娘炳」到連D&G都唔知係乜嘅大學畢業生，點樣喺魔鬼上司地獄式培訓下，慢慢由醜小鴨變天鵝。套片有《色慾都市》（SexandtheCity）服裝指導PatriciaField出手，令安妮日日返工有唔同嘅Prada、Chanel、MiuMiu、Galliano同VersusVersace靚衫上身，十足日本漫畫家矢澤愛嘅少女漫畫，令愛時裝嘅觀眾眼睛大吃冰淇淋！多位時裝界名人，好似名師華倫天奴（Valentino）、超模HeidiKlum同GiseleBundchen都會齊齊客串㖭。
學滿師拒留低
眾所周知，電影原著小說係根據原作者LaurenWeisberger大學畢業之後走去《VOGUE》做總編輯助理嘅經歷，佢做唔夠一年，就頂唔順老闆Anna走人，同樣電影中嘅安妮學識咗時尚界嘅說話、生活態度同處事方法之後，唔止愈來愈懂得遊戲規則，亦發現現實嘅殘酷，所以佢都選擇走人，到底套片係捧fashion定反fashion，真係見仁見智喇！