香港，單單銅鑼灣已經有180幾間日本菜館；過江，澳門嘅日本餐廳實在唔多。去親澳門嚟嚟去去都係食葡國菜嫌悶？今日就一次過介紹兩間日本餐廳畀你，想喫抵食日式自助餐，定叫和服美少女燒日式燒烤畀你食？自己諗喇。
記者：黃若茵
攝影：林栢鈞 模特兒：Katie
日式BBQ自己燒
入到「飛苑」，一個個和服美少女好有禮貌同我打招呼，第一個印象唔錯，呢度唔只侍應生質素好，就連米粒都極高質素，大廚羅先生話：「之前走高檔路線，但發覺好多遊客都唔多肯使錢，最近轉型行大眾化路線，不過就無將貨就價，依然用番高質素食材，好似米咁吖，我堅持用比一般米貴10倍嘅日本純情米，食落煙韌口感更好。」一心改變策略，餐廳最近推出好多套餐，價錢$45左右，大大份好抵食。想食貴價？又得，可以揀日式燒烤，有勁靚嘅和牛柳同鱈場蟹供應，你可以選擇和服美少女幫你燒，自己親手燒過手癮都可以，喺香港甚少日本餐廳畀客人落手落腳燒食物，而且個爐唔會太大煙，夠晒過癮喇。
和牛柳$250
羅師傅：「日本入口和牛牛味較重，咬落仲好軟熟㗎。」燒好咬一啖，嘩，肉味好香，難得在唔似一般牛肉咁嚡口。
鰻魚$80
羅師傅：「用1斤重游水鰻魚，肉厚無肥油，燒出嚟個皮又夠脆。客人可以選擇汁燒或者白燒，燒完點豉油同Wasabi超正。」
蟹腳鹽燒$450
蟹腳大隻多肉，未燒已經流晒口水，只簡單用鹽調味，燒完熱辣辣咁食，肉質結實啲肉汁咇晒出嚟，超香。
咖喱豬扒飯$42
午市套餐包沙律、味噌湯、厚燒玉子同1杯飲品，勁抵。師傅親自調製咖喱汁，加入蘋果及日本喼汁，甜中帶酸好開胃。
搵食攻略
飛苑（853-331986）
地址：澳門議事亭前地18號蔡瀾美食城1樓
營業時間：12:00nn-11:00pm
交通：碼頭乘的士約$17
座位：80個
日式自助餐只此一間
「欽點燒」係「飛苑」姊妹店，主打日式自助餐，聽負責人咁講：「老闆喺香港做咗廿幾年批發商，攞到唔少新鮮靚魚生。」我立刻望吓有乜靚貨先，唔，連香港少見嘅秋刀魚壽司都有喎，「秋刀魚易變腥，所以多數日本餐廳都會用鹽燒?法辟腥，我哋用得秋刀魚生做壽司，梗係因為啲貨夠新鮮啦。」自助餐時段唔算長，但望落有唔少人幫襯喎，「我敢講，全澳門全店只做日式自助餐嘅餐廳得我哋一間，湯、壽司、魚生、串燒、甜品乜都齊，仲有師傅即場整畀你食，喺香港都未必有呀。」
秋刀魚壽司
三文魚都好新鮮，不過我寧願食多幾嚿秋刀魚喇，一啲都唔腥，浸過醋略帶酸味，必食。
生牛肉
生牛肉做得頗有水準，外層略為烤熟，其餘部位依然夠生夠嫩，肉中帶少許肥，加強口感。
溫泉蛋
薄薄一層蛋白做得極滑，加埋個溏心蛋黃認真無得彈，雪一聲成嚿質入口，好滿足。
日式煎餅
即做煎餅好香脆，快脆食，放耐會變腍會影響口感，餡料有章魚粒等，甚有咬口。
食客有Say
搵食攻略
欽點燒（853-330723）
地址：澳門議事亭前地18號蔡瀾美食城4樓
營業時間：
6:30pm-10:00pm，自助餐時段分別為6:45pm-8:15pm及8:30pm-10:00pm
交通：碼頭乘的士約$17
座位：140個
收費：成人$158，小童$78