Game事撻：1碟打齊19Games機舖友最撐《街霸》

子彈橫飛，刀光劍影，今日打街機，講求爆得精采、殺得漂亮，但老實講句︰「玩得多有啲膩！」反而，忽然畀你遇番隻兒時喪煲過嘅遊戲，細個同Ｂ仔爭機打嘅片段，頓時湧上心頭，叫人會心微笑。最近PSP出咗隻《CapcomClassicsCollectionsVol.2》，當中收錄咗19隻經典街機遊戲，好似《1943》、《街霸》同《戰場之狼》等。唔知當中有無邊隻，曾叫你愛得死心塌地呢？
記者：陸俊雄
攝影：何家亮
ImageModels：大文、Vivica
鳴謝︰觀塘金沙遊戲機

機舖友論經典

講經典，當然要搵班機舖友揀吓19隻入面，邊隻至係心目中「經典中嘅經典」。筆者深入機舖問過多位資深Game迷，近九成都話︰「梗係《街霸》啦﹗」其次答《1943》。聽完佢哋嘅高見，忽然覺得當年交咁多學費操呢兩隻遊戲，都係值得嘅！

收錄三集經典《街霸》

今集《CapcomClassicsCollectionsVol.2》對《街霸》特別厚待，收錄咗3個版本，分別係最初8人版，其次係加入鬼爪、司令等嘅12人版及12人嘅加速版。鍾意玩技術，而唔係靠屈機打到全個畫面都係手刀同波嘅你，8人舊版一定最啱玩。
至於玩過PSP嘅都知道，佢個十字掣唔多靈，打格鬥Games時好唔方便。所以Capcom就隨碟送個白色十字掣，等玩家打《街霸》時，可以更加得心應手。不過唔好諗住有咗十字掣就無敵，因為單係8人版嘅Normal模式，已經非常惡打，筆者可能太耐無玩，用阿Ken對青狼，經常畀電腦「食Perfect」。

■唔用白色十字掣玩，好難出昇龍拳。

■赤目司令再現，當年大受歡迎嘅軍佬嚟個腳刀回應。

舊Games難度激增

如果你想彈今集部份舊Games畫面質素唔好，對唔住係時代嘅錯，當年遊戲畫質係得咁多，今集已經移殖到最好。唔少人就係要見番當年啲核突公仔、簡單設計，咁先可以重拾昔日回憶。不過大家唔好睇小啲舊Games，筆者敢講隻隻都勁難打，如《1943》、《戰場之狼》、《GunSmoke》咁，幾隻都係10級難度嘅射擊遊戲，連魔界村系列出名難打都行埋一邊。
另外19合1中，有3隻Games可以3人連線合作嚟打，好似邊打邊升Level嘅動作遊戲《KnightsoftheRound》、殺龍又施魔法嘅《TheKingofDragons》、史太龍咁款嘅《戰場之狼Ⅱ》，3人行易過關好多。其次係《1943》同《1943改》可以２人連線，《街霸》則可以對打。