第一上海（227）將喺呢個星期二（12號）派中期成績表，買定炒靚靚業績。第一上海去年出售嬰孩用品公司「好孩子」及上海物業權益，齋計前邊好孩子業務，已經可以為集團帶嚟過8000萬銀溢利，兼且應該喺即將公布嘅06年度中期（6月止）入賬（集團05年度中期純利，講緊1494萬銀咁大把），呢期業績一定靚爆鏡。
第一上海若有爆炸性增長，估計主要係靠非經常性收益，但正因為資產出售，可以為第一上海套現達6億銀。高現金回籠，加上集團暫時有無乜搞作，不期然又會聯想會唔會有甜品送。再講，大市再企於今年高位，證券股好似大福（665）等都郁郁槓，兼且第一上海P/B不過0.6倍，唔係6倍，炒證券股，梗有第一上海份。短打炒業績，博見0.8元，回報率講緊14%，有魚有肉。
冠軍PE低到離譜
冠軍（092）最近個幾月，喺1.3元打底，日線圖三條主要平均線滙合，又係等爆。冠軍06年度中期（12月止）純利2.76億銀，增長兩成，已經有中期業績打底，下半年業績穩打穩紮，06年度預期PE，應該仲低企3字頭，低得離譜。
又冠軍NAV3.9元，現價（1.32元）相對折讓高達66%，科技股有咁嘅折讓，又係離譜。短打博冠軍上番4月高位1.46元，有一成回報，長線就要考慮機會成本。