程翔案判決書，據程翔嘅辯護律師何培華講，屬國家機密，唔可以泄露。但在中國大陸，甚麼是國家機密，甚麼是絕密，係官字兩個口啫，中貿林從事中國貿易多年，見過不少官方文件，紅頭文件，幾乎無一不是機密，但如果唔向外商講解文件內容，點傾生意，點做生意？中國外貿界人士可能日日泄漏機密，唔通個個都係間諜？程翔在內地報道新聞多年，見得內地機密文件太多，不以為意，寫文章時引用文件資料，頂多係犯了泄密罪，唔係間諜罪。
何謂間諜？根據判決書，向間諜組織或間諜組織掩護人泄漏機密，就係間諜行為。唉吔，弊咯，台灣有唔少民間智庫、研究所，大陸亦有唔少甚麼研究所、學術組織，一般人，包括記者在內，點知道邊一個係間諜組織或間諜組織掩護人？台灣嘅「光華文化中心」在港多年，以前江素惠、現在平路，都好活躍，搞過唔少論壇，討論會，唔通香港文化人要懷疑光華文化中心，懷疑佢哋兩位？唔少熟悉大陸情況來自內地嘅人士，久唔久就在港對內地政治情況發表意見，唔通佢哋又犯咗泄密罪，甚至間諜罪？
程翔判決書不知如何會在「星島環球網」公諸於世，都唔知有冇人會將來被控泄密罪或偷取國家機密罪，我哋唔理得咁多嘞，一於仔細睇真啲，睇完就不寒而慄，做中國記者嘅朋友就更加驚，泄密罪或間諜罪隨時可以加諸各位頭上，加罪嘅主動權操於國家手上。自保嘅第一招就係唔好同國家領導人嘅身邊工作人員（如陸建華呢類人物）來往，以免受政治鬥爭牽連。第二招就係唔好與台灣人員來往，因為你哋唔係許崇德。許老人今年年初去過台灣與歐亞基金會交流（程太劉敏儀所言），許老人事前是否「明知」或「不知」歐亞基金會係「中國國家安全部間諜組織」確認為台灣間諜組織呢？許老人唔該解釋吓。美國FBI屈過李文和係中國間諜，打咗好耐官司之後，李文和含寃得雪。在中國人地方，睇吓程翔有冇李文和可以打官司咁好彩？