分分鐘平過一晚5星級酒店普通房的價錢就可以直飛倫敦？對，你無聽錯，我亦無講錯。新上場的甘泉航空打着超值價格旗號，推出$1,000香港飛倫敦的單程特平機票。不過，別以為$1,000就可以上到機，如果唔小心，可能仲貴過買張正價飛，留意留意。
記者：梁學文
單程$1,000咁來回呢？
以前$1,000直飛倫敦簡直是天方夜譚，不過隨着甘泉航空的成立，千零蚊就可以出到機票，不過，$1,000只是單程價，而且每班機得28個位……而正常經濟艙單程票價由最低$1,000至$7,000不等，商務艙單程票價由最低$6,600至$20,000不等，如果買得到去程但買唔到回程，最後埋單可能貴過買正價呀！
附加費要留神
大家都可能知道，就算機票更平，一計到附加費，張機票即時漲價唔少！附加費包括燃油附加費同機場稅等，以甘泉為例，一張飛燃油附加費是$481，兩程咪要$962，仲要未計機場稅$153，加加埋埋，都幾襟計喎！
包唔包餐飲？
正常機票通常包括埋機上的膳食及飲料，一程長途機最少要在機上吃兩餐飛機餐，不過，好多平價航空都唔包食，肚餓口渴唔該畀錢！但甘泉就包熱騰騰飛機餐，但飲酒同小食都要額外收錢囉！
搞清楚目的地機場
平價航空公司為減低成本，往往會選擇在位置又多數較偏遠的二線機場降落，因此花在交通的時間自然亦相對增加！例如甘泉航空選擇在格域（Gatwick）降落，而格域比由希斯路往市區的路途足足多了21公里，坐巴士需時個半鐘，亦要多付車資。
改機票要收錢
買機票前要留意機票的限制，如是否可以更改乘客名稱、出發日期、出發地及目的地等。一般而言平價機票是不能隨意更改航班或是出發日期，更勿論出發地及目的地，要改多數都要加錢，或者有所謂的罰款。
甘泉航空乜東東
甘泉香港航空為首間本地以經營廉價長途航空為主的航空公司，專注來往香港及歐洲的直航航班，預計10月完成試飛後（因現階段仍未取得民航處的許可證），於10月25日正式投入服務。
有咩好？
1）平價機都有熱嘢食
吸引係當大部份平價航空公司唔包嘢食時，甘泉有免費飛機餐供應，仲有中西餐選擇。
2）機上娛樂一樣有
超值，因為甘泉全程提供免費娛樂，坐飛機唔怕悶！
3）一千始終好吸引
$1,000單程去倫敦始終好有噱頭，而且可能帶來機票大割喉，得益嘅都係旅客！
有咩唔好：
1）用二手機
甘泉選用的747-400航機，是改裝購自新加坡航空的二手機，機齡平均17歲。
2）班次唔夠密
10月份每周提供4班航班往來香港至倫敦，目標是在11月增至每日1班。但單是國泰一日已有4班機。
3）熱線冇人理
小記曾試在公開發售日至截稿日打電話及網上訂票，惟訂票熱線經常出現打不通或無人接聽，登入網址亦很困難。
4）平飛不足30張
今次推出的$1,000平價機票，其實只佔總機位（每班機共81個商務及278個經濟客位）一成，好難至book到。
5）兒童餐要收錢
含酒精飲品外，兒童餐同特別餐都要額外畀$75，唔抵！
查詢：www.oasishongkong.com
訂票熱線：36280628
倫敦機票大比拼！
有新航空公司上場，其他航空公司當然不甘示弱，面對新對手搶客，繼於暑假推出優惠之外，部份航空公司在暑假後亦會增加來往倫敦的航班班次，像維珍航空將於11月增加班次，紐西蘭航空更會於10月29日開始由新西蘭經香港飛倫敦。𠵱家飛倫敦，咪講笑，真係有可能平過返大陸。
