理工大學物流管理系3年級生Mavis住宿舍，放學返Hall夜晚唔愁無得開餐，「好多住Hall嘅同學因為周圍乜都無，所以會自己煮飯食，但我就好多時都會約埋同Hall宿友出街食飯。」Mavis唔係唔識煮飯，實情係貪方便費事煮，理大宿舍位於紅磡灣，行落黃埔好方便，「黃埔有唔同類型食店，不過餐餐出街食飯好甘，所以會揀啲平靚正食店。」做日本料理嘅「一本」就係佢心水推介︰「食物唔貴質素好，仲要成日做推介，好抵食，所以會叫埋同房同其他同學一齊嚟幫襯，叫多啲又可以食多啲唔同類型菜式。」「一本」負責人話，之所以賣得咁平，係因為店舖位置人流唔多，希望薄利多銷，所以每逢夜市，就會見到大班細班Poly宿生圍枱開飯，儼如一個小型Poly飯堂。
記者︰方綺君 攝影︰周旭文
三文魚竹筒飯$10
Mavis︰「竹筒飯次次都會叫，貪平又易飽嘛。」三文魚同其他配料炒香，加飯放入竹筒焗15分鐘即成，一開蓋勁香，正。
三文魚刺身$18，鹽燒三文魚頭$10
一碟有5件挪威三文魚，份量適中。鹽燒三文魚頭食落唔腥，用鹽燒夠入味，Mavis強力推介：「入口啖啖肉只係$10，抵。」
鐵板燒巴西牛扒$20
鐵板燒係學生哥另一至愛，舖頭有十幾款鐵板燒選擇。燒過嘅巴西牛扒軟腍多汁，大大件肯定飽到上心口。
一本（26270608）
地址：紅磡蕪湖街185-187號地下
