近年發展商賣樓都鍾意喺付款辦法上搞好多花臣，務求令你睇到眼花撩亂，迷迷糊糊，仲慘過食咗弗得。好似長實啱啱重推嘅葵涌雍雅軒都會天峯，明明自己會直接減價，但又扮晒唔減價，搞個乜嘢「一千零一夜」嘅3年免息免供計劃。網友redots不值其所為，係《香港討論區》直接踢爆呢款計劃即係相等於減樓價17%咁多……叫大家唔好俾人老點。
附和嘅芝芝吉網友更一針見血咁話：「如果發展商覺得樓市好，使咩出招。」
不過，名為最緊要舒服嘅網友就似乎睇唔過班香港人鍾意攞小便宜嘅心態喇，有啲嬲咁抦：「如果唔出招，你哋班友又唔買啫，香港地大把cheap友啦，係都要發展商或者業主減價先開心地死去買。」佢又串redots：「計嚟多餘，覺得貴咪唔好買囉……香港地多得你班咁嘅人，所以全香港啲樓市呀、零售呀都唔好……」
記者認為，呢個plan都幾複雜，自問唔係財務專家，唔敢亂計。不過，要提醒大家幾點：（1）一定借唔足九成，因為銀行係借一按畀你時，估價時會扣咗利息優惠，所以一按實唔足七成，𠵱家發展商借盡二按都係兩成。（2）發展商補貼一按利息，鎖定係按揭年利率5.25厘，如果按息呢3年係咁升，咁出現息差就貴客自理。（3）遲兩年先供，每個月供款同埋尾計算時都要供多唔少，根本無着數。（4）二按利息係最優惠利率（P），勁貴，供親實變老襯。
hitrate指數：780次
報料電郵：[email protected]