踏入9月冇幾耐，唔少零售股有異動，寶姿（589）、包浩斯（483）同I.T（999）都有表現，皆因又炒黃金周概念。堡獅龍（592）雖然都係時裝零售股，但股價唔見起色，噚日冇升跌，收報0.55元，咁反而惹起一啲股民嘅興趣。
喺「香港討論區」內，網友peterwong11喺0.54元排隊入唔到，佢認為「呢隻嘢一升起上來嚇都嚇死你……長遠就唔錯，不過要等啲內地人愈來愈有錢，咁就有回報啦，𠵱家喺大陸打定個基礎先」。不過晴天公仔就唔係咁睇，佢話：「我曾經都諗住買呢隻嘢，咁買之前我就落去bossini啲shop行吓……你可唔可以問吓你自己，你會唔會去佢哋間shop買衫呢？一般人又點諗呢？答完呢啲先諗買唔買啦」。
堡獅龍喺7月中公布全年純利大幅倒退42%，摩根大通跟住唱淡，叫客戶減持，令股價裂口下挫，之後一直喺0.52至0.62之間橫行，照圖表睇，繼續橫行嘅機會好高，短線就算反彈，水位都唔多；如果諗住同佢長相廝守，就要睇吓0.67元阻力穿唔穿，穿咗至有得講。其實近兩年啲舖租升得咁癲，零售生意好難做。炒黃金周概念？炒咗咁多年仲有得炒咩？諗吓先啦。
余文