以配搭Cam仔打機嘅EyeToy，喺PS2上尚算成功，推出過多款抵死好玩嘅遊戲，算係坐定定呆板打機以外，另一體感玩法。既然有市場，SONY梗會將佢帶埋落新機PS3度；呢款名為《審判之眼》（TheEyeofJudgement）嘅新Game，以卡片組合玩法為主，喺剛過去嘅E3度就已有測試版供入場人士試玩，好多玩過嘅人都大讚佢同Cam仔夾得好，能準確捕捉玩家手部移動，喺遊戲入面擺下「卡片陣」，以鬥快攻佔九宮格入面所有格仔為目標，玩家由擺卡到召喚怪獸，都係「一手」搞掂，就恍如真係拎隻怪獸上手把玩一樣，感覺幾特別。
從官方最新公布嘅畫面上睇，可見到各式怪獸各分火、水、地、土、機會等5種屬性，互相克制，戰勝對手非一味靠卡牌等級，戰略味相當之重！遊戲中嘅卡牌種類更達100款以上，要戰勝對手真係要花點心思。除咗PS3嘅手掣擺動感應外，玩捕捉視像嘅《審判之眼》相信可為PS3加入更多體感玩法，稍為抗衡任天堂Wii嘅全動感玩法。
記者：徐影龍