英格蘭又贏波啦！周三歐國盃外圍賽作客全場表現極佳嘅馬其頓，又係靠前鋒高治妙到絕嘅車身倒掛小勝1:0，保住1.28倍熱W，而新帥麥卡倫帶隊後已連贏3場。
高治近10場國際賽入11球，被睇好可打破名宿卜比查爾頓國家隊嘅49球紀錄。點知呢段新聞出咗街，搞到一名英格蘭球迷食慾不振！呢位球迷話一聽到高治係「入球機器」，原本食緊早餐嘅佢即時鯁親，繼而再去廁所嘔咗一輪！
有傳呢位係利物浦球迷嘅X先生，話𠵱家已經成個禮拜食唔落早餐，一諗起高治被讚可以破卜比查爾頓紀錄，佢就即刻冇晒胃口，你都咪話唔誇張。
高治好唔好波，我求大俠都唔敢亂咁評論，但係呢位身高6呎7吋嘅利物浦前鋒，高大之餘又確實腳法唔錯，更重要係佢肯返中場迎波幫隊友，上場對馬其頓佢又有波入，抵高治得戚嘅。
失機多過入波
X先生仲講到啲人淨係記得高治好嗰一面，入幾粒波就捧到上天，唔諗吓佢喺利物浦成日失埋啲「依絲餐士」，搞到球隊贏唔到波，睇嚟X先生就算係利物浦球迷，都一於冇畀面高治喎。
高治呢期紅就梗㗎喇，佢有佢入波，球迷就惟有繼續嘔囉！
「好多球迷都會跟紅頂白，呢期高治紅到發紫，X先生都企番自己嘅立場狂踩愛隊球星，求大俠當然欣賞呢啲唔跟風嘅球迷啦！」