呢兩日嘅非常話題，肯定係女星裸照外洩嗰單料！大家對於邊位係A小姐似乎最為關心；但你哋有冇諗過，呢件相片失竊事件其實只是冰山一角，下次唔見手機然後俾人登玉照上網嘅受害者，好可能係你呢！要避免同類事件再次發生，其實一啲都唔難，只需要簡單㩒幾個掣操作，即可鎖上手機，就算俾人執到「寶」亦冇晒符啦！
簡易自定密碼
以A小姐部摩記V3i為例，其實MainMenu裏面有項叫「設定」嘅功能，再入多一層「安全性設定」之後，你只要輸入一組上鎖密碼，即可KeyLock手機；再輸入一組解鎖密碼嘅話，就可以開番，用法相當Easy。但必須留意嘅係，萬一你連續輸入3次都錯誤，大部份手機就會自動鎖死，即使你再入番一組正確嘅密碼，亦於事無補，唯一解決方法就係拎部機去代理商度搵專人處理！
手機上鎖Easy！
E61遙控鎖機
如果你驚自己冇記性，經常唔記得密碼嘅話，前排嗰部諾記E61可能幾啱你，皆因佢玩埋遙控鎖機功能！玩法同樣簡單，只要事前Set好一組鎖機密碼就得；與一般手機分別係，當平日用電話嗰陣你唔使輸入密碼，直至不幸遺失手機之後，你就可以經任何一款配備SMS功能嘅手機，用短訊方式Send組密碼去自己部手機，咁就會即時啓動遙遠上鎖，俾人執到但資料仍然不失。為保障個人私隱，各位機民不妨試吓！
記者、攝影：陳國輝