本來一直以為，PS3臨近11月11日推出大日子，理應所有貨運同測試已完成得七七八八，連嚟緊月尾嘅東京遊戲展（TGS），官方亦事先張揚全場PS3用實機示範同試玩，一切準備就緒，只等11月全球搶貨日子來臨。點知SONY喺前日正式公布，歐洲原定11月17日上市嘅PS3，要延期至下年三月，SCE社長久多良木健即場解釋，PS3主要受Blu-ray雷射頭出現誤差而令生產量降低，首批上市目標由200萬部急降至50萬部，不過目前已將主要生產線由白石搬至木更津。幸好另一重要元件Cell處理器生產順利，社長仲誇下海口話06年內出貨六百萬部冇問題！
唉，照咁睇到時貨源又一次短缺，全球搶貨下到港水貨肯定炒起，希望SCEH能同期帶點「行貨」到港吧！
記者：徐影龍