議員T生活優游，久唔久就睇到新聞，話佢喺拉斯維加斯贏咗一百萬美金。呢日啱啱碰到佢，問佢係唔係賭神，點解時時贏錢？議員T話：「我輸咗錢冇話畀記者聽啫，老實講，我乜嘢海外賭場都去過，有輸有贏，但贏得多，輸得少，所以一年埋單計數，都係贏得幾開心。旅遊住宿飲食，全部享受一流，冚扮爛免費嘅！」點樣先至會贏多輸少呢？議員T話做人最緊要識得止蝕，賭錢亦然，入賭場之前，已經預定最多輸幾多（maximumloss），輸到呢個數目，立即離枱鬆人，絕不磨爛蓆。
止蝕銀碼人人不同，譬如左丁山去到墨爾本皇冠賭場、拉斯維加斯凱撒皇宮，輸咗兩百美元就開始肉痛，輸到五百美元，即時走夾唔唞。議員T嘅止蝕額就係一百萬港紙，輸夠就唔玩，幾個月後先至再賭過，如果贏呢，就一路谷落去，以贏得嘅金額同賭場玩舖勁嘅，贏到一次大大哋，已經封晒全年蝕本門，贏兩次就當攞到全年皇帝式享受。
議員T啲豪氣唔係人人學得到嘅，散戶買股票往往贏粒糖，輸間廠，股票升時就驚股價跌番落嚟，急於止賺，股價跌咗，就心思思去溝淡，點知愈溝愈低，卒之蝕到眼光光。議員T一早就識得止蝕不止賺，輸粒糖，贏間廠。贏咗咁多年，議員T已經有幾億身家，豪得起。
但係香港有好多富豪，身家厚過議員T億億聲，點解唔會豪得過議員T？無他啫，心有所掛，有十億想二十億，有二十億想一百億，有一百億想創立萬世基業……日日掛住搵銀。搵銀就要兼顧好多方面，例如巴結權貴（或者最少唔得罪），總之面面俱圓。喺美國，大罵布殊仍然可以繼續搵錢，反對布殊政策照樣做生意，索羅斯、畢菲特、蓋茨就係好例子。中國人咯喎，邊有大商家膽敢批評胡錦濤，反對溫家寶宏調政策呀？是故中國人大商家有好多思想限制，唔得快樂。議員T話好知足目前光景，鍾意使錢多過搵錢，故此十分豪氣。