一直捧場嘅波友，會發覺小弟甚少提供半全場、單雙及波膽推介；原因好簡單，博彩不同投資，呢版希望透過一些有系統嘅數據及球隊實力分析，點出一些值得中長線捧場嘅球隊，博穩定嘅回報。
周中再貼中荷蘭「主勝」，呢個1.5倍賠率，算合理，外地莊家開出亞洲盤讓兩球，相信嚇窒不少賭客；但馬會大員，真係好嘢，整個周中開出嘅「讓球主客和」都相當保守，與上周六有所不同，似預計「周中波，贏唔多」，結果大部份超強球隊嘅大熱「主客勝」都未能開出，連荷蘭都唔開[-2]，將呢場波嘅損失減到最低；不過莊家亦有睇錯時，德國作客開到[-4]，結果大炒13球，「客勝」派1.9倍，走眼咯，好彩臨尾盡殺西班牙1.22倍單W，乜都攞番晒，連續兩日國際賽都有大熱強隊失手（上次係意大利），證明大熱W串燒風險唔細，波友下個月初再賭歐國盃要留意。
小弟喜歡用較大注碼買「讓球」、「讓球主客和」或者最簡單主客和2至3場互串呢類投注，其他只係間中撞吓手神，免嘥彈藥；好似半全場，最戇居係買主/主，九分一機會，賠率又唔好分，隊波開出和/主，又或客/主，你必定氣頂。筆者有個戰友最喜歡買和/主，貪有4至5倍，即係4、5次中一次都唔使輸，我個人不作批評，只希望他一直有恒心地做下去，好似你去到馬場，場場買冠軍騎師韋達一樣，其他如買單雙，更不值推介，睇住場直播，起起跌跌你心血少啲的話，贏都補唔番。
踩過界推介「利是鋒」
馬季嚟緊周日開鑼，小弟自細熱愛賽馬，尤其對大摩馬房情有獨鍾，佢老哥每季都有一個穩定嘅出擊模式，能屹立馬壇廿多年不倒，自有道理，開鑼一於捧摩家軍，啱心水博吓老馬「利是鋒」（圖）WP，跑淋地更妙。文：蘋果波神