夏韶聲最近自資推出的專輯《諳III》銷量不俗，現時唱片市道低迷，夏韶聲也替新一輩歌手可憐，不過他覺得樂壇新人「垃圾」居多，只比較欣賞泳兒及衞蘭。
入行27年的夏韶聲，唱過《空櫈》等膾炙人口的歌曲，其滄桑聲線已成為標記。今年7月他推出翻唱多首老歌的專輯《諳III》，深受HiFi發燒友追捧，他意氣風發的說：「之前我冇期宣傳，但估唔到推出一星期之後就有萬多銷量，即刻歸本，𠵱家賣一隻就賺一隻。我記得之前同徐小鳳通電話，大家先講起以前邊有話賣唔賣到萬幾吖，𠵱家做新人真係好慘。」
指側田非突出
雖然夏韶聲在美國定居，但仍會留意香港樂壇，他慨歎每年都會有樂壇「垃圾」，要數唱得之人，他只能道出泳兒及衞蘭。夏韶聲讚衞蘭人靚歌甜，但論唱功，還是泳兒優勝。對於泳兒不時被批評相貌平庸，夏韶聲即安慰對方說：「樣可以磨吓磨吓，執一執就得啦！」夏韶聲又表示不太認識男新人，也不覺側田突出。
經歷過三次婚姻失敗的夏韶聲，如無意外月內會再做老襯，與相戀三年的Tina拉埋天窗，他說：「已經第四次，唔使點籌備，不過我哋都未定實時間，之前話9月係因為我哋喺9月23日認識，所以先想喺番呢日啫。總之我結咗婚一定會講畀大家知，因為呢次係人生最後一鋪，係一生一世㗎！」
採訪：駱華齡
攝影：陳俊強
場地提供：BB'sBistro
