周六由國際賽返回聯賽，個人自然信心增強不少，今次決用兩場非直播嘅英超賽事做主打，熱選主場王保頓單W，冷敲作客王韋根「客勝」。蘋果波神
英超唔同國際賽，各網站有大量最新資訊同充足數據提供，捉路話咁易；加上個個禮拜畀呢個聯賽嘅直播浸淫，點都有咁上下認識；話過呢個欄盡量減少貼直播波，所以本周嘅3大強隊車仔、阿仙奴同曼聯嘅熱爆W，不列作投資版貼士，由明天其他本報專家再品題。大家要留意，3支強隊陣中有大量球星連踢兩場國際賽，加上下周中歐冠盃開鑼，領隊們喺聯賽會唔會變陣？好似阿仙奴亨利啱啱替法國打冧死敵意大利，踢足90分鐘，雲格會唔會留番佢下周三作客對漢堡？所以今次小弟建議大家對呢類強隊採保留態度，到臨場check清楚軍情先買波為上着，對3強買早飛意欲不強。
射手以逸待勞必搶韁
要買早飛，先捧迎戰屈福特嘅保頓，有睇佢哋季初首戰對友賽王熱刺嘅波友，相信會印象深刻；莊家開出平手盤，明顯想高調提番畀波友知熱刺季初好勁，結果甫開賽保頓攻入兩球，就此奠定勝局；包括筆者在內，相信好多人對呢個戰果感到意外，「前事不忘，後事之師」，再次證明保頓主場嗰種壓迫力，唔係咁多球隊頂得順。
據澳彩網頁翻查近屆亞洲盤盤路，發現保頓近3季主場都錄得超過50%的不敗率，上季更勁，達66%；今次對手係大熱降班膽屈福特，各地開出1.57-1.6倍單W相當抵博，除咗主場勁外，陣中大部份主力包括路倫、甘普、史必同廸奧夫等射手，都無份踢國際賽，又無周中歐洲賽纏擾；安歷卡來投，前鋒多個用到波嘅速度型射手，應該啱使，呢個單W賠率真係有買趁手。冒進者，可兼顧上盤，開飛有1.87倍。
韋根急簽3件有前途
冷敲韋根，作客季初勇猛嘅樸茨茅夫必被睇小，但查上季乃數一數二嘅亞洲盤作客王，18場錄得12勝1和5負嘅驕人成績，包括作客受讓平/半，贏老樸2:0，個人認為老樸係唔係咁勁，𠵱家判斷實言之尚早，單W調熱至1.85倍已過份，韋根在轉會市場關閉前，簽入基爾賓尼、托度洛夫同葛達利3位攻擊球員，財力同實力唔差得過老樸，兼捧韋根大冷單W都值得一試。
投資特攻隊金句
英超3強有大量球星剛踢畢兩場國際賽硬仗，下周中又要應付歐冠盃，建議大家不要急於落早飛，以免臨場賠率調冷蝕底。