香港大學位於半山區，學校附近嘅水街係港大生搵食熱點，港大中文教育2年級生阿Va話︰「水街好多舖頭我都幫襯過，最鍾意『飲冰室』。」「飲冰室」做正宗台灣料理，老闆區先生話︰「我經常去台灣搵料，試吓人哋做嘅料理，睇吓𠵱家台灣興食啲乜。」叫得做冰室，點少得台式刨冰？舖頭提供十幾種唔同口味刨冰，磨冰機購自台灣，磨出嚟嘅雪花冰入口即溶，唔會食到成口一粒粒冰碎，因為賣台式刨冰嘅地方唔多，所以就算唔係港大生，好多人都會專程嚟食個刨冰㗎。
雖然由港大東閘（即人人稱做大牌坊嘅門口）行去「飲冰室」不過5分鐘路程，阿Va上課地點唔近東閘，但都會老遠兜多幾個圈行多15分鐘幫襯，「呢度Lunchhour例爆場，就算放咗學嚟食飯都好難有位，成日都要等位，搞到我食Lunch食到過晒鐘，上下一堂遲到呀。」
記者︰方綺君
攝影︰林栢鈞
日式照燒雞扒飯 午市$24 晚市$28
雞扒夠大塊好抵食，兩個女仔Share都仲得，照燒汁超香濃，雞扒入口啖啖肉好嫩滑，難怪成為午市最好賣食品之一。
魚生飯 午市$32 晚市$38
有齊八爪魚、鮑魚、三文魚、北寄貝、蟹柳、蟹子同蝦，足料飯又多，午市套餐有是日特飲奉送，轉其他特飲加$6，抵。
豬軟骨拉麵 午市$28 晚市$32
豬軟骨用台式秘製滷水滷足4小時，入口軟腍入味，湯底用老雞、豬骨等熬成，係個台日合璧嘅菜式，啖湯甜到漏㗎。
飲冰室（25176678）
地址：西環水街33號地下
