齋隊Tequila，掯呀，食墨西哥Tequila菜，火都嚟埋㖭呀！烈酒灌入煎Pan標起熊熊烈火，單濃濃酒香已經勁攻鼻。喫龍舌酒醃烤醉豬扒，唔會食醉你，但一定會令你喉嚨火辣辣，唔怕辣唔怕食到火都嚟埋，就鋸番件扒質入口，當挑戰自己味蕾喇。
記者︰林雪兒
攝影︰譚盈傑
模特兒︰Natalie
1.龍舌酒醃烤醉豬扒$136
10安士美國豬扒用CuervoGoldTequila、墨西哥醬料醃製再網燒，青辣椒加大辣椒炒香粒係墨西哥菜特色，醉豬扒入口幾辣吓，好彩有飯中和吓辣味。
2.龍舌酒青檸烤雞胸$134
用GranCentenarioPlatoTequila、辣椒及青檸汁醃雞胸，烤熟配東東米上碟，入口香脆雞胸肉滑溜，相信OL最啱食，因為酒味唔濃烈，反被其青檸味道所吸引。
3.羊奶芝士沙律$65
喜歡濃味嘅朋友就啱晒啦，呢個頭盤用1800Anejo混入焦糖洋葱，伴味道濃郁煙韌嘅羊奶芝士，口感綿密豐富，好正。
4.龍舌酒醃烤牛油魚柳$138
用GranCentenarioReposado、青檸汁醃肥厚魚柳，加青檸皮、亁葱茸再烤焗。牛油魚鮮甜嫩滑帶陣陣酒香，伴碟有份量十足味道濃郁嘅薯茸芝士卷，一定飽肚。
5.酒醃燒西冷牛扒$138
8安士西冷牛扒用GranCentenarioAnejoTequila醃過，伴碟有香草薯仔，大大件牛扒肉汁鮮美，但食落一啲都唔覺得肥膩。
6.酒蝦沙律$65
新鮮大蝦加清甜JoseCuervo、亁辣椒一齊煎香，龍舌酒帶出大蝦鮮味，配酥脆嘅玉米烙餅及沙律，味道清新令人食指大動。
教你飲Tequila
有辦你睇齋飲Tequila（$180-$420）有幾掯，模特兒Nataile平時滴酒不沾，試飲完話：「入口初頭唔覺得好掯，隔一陣喉嚨開始感覺到火辣辣，好似俾火燒緊咁，我唔敢飲太多，因為好辣喉。」掯就係人都知，Tequila正宗飲法你又知唔知？𠵱家教埋你喇──
1.將鹽粒撒喺手背，輕輕舔少少除去Tequila澀味。
2.拎上手，即飲，豪情啲，一嘢成杯隊落肚。
3.最後啜一片青檸或香橙片，感受一下餘韻。
拉丁樂隊唱Live
香港不愧為國際都市，5月有浪漫法國節，6月有悠閒意大利節，9月就輪到熱情如火的墨西哥節。點火法？用火辣辣Tequila入饌夠火未？「Coyote」擺滿仙人掌，餐廳格局本身已經夠異國風情，開放式兩層設計面積寬敞，誇張講句令人有如置身鬧市綠洲，好想Hea番陣。講真呢度都幾啱Hea，逢周六9:00pm後有拉丁樂隊坐鎮，聽Live正到爆，鍾意跳Salsa嘅朋友仲可以隨歌起舞。跳到興起咯，啪番杯墨西哥特飲Margarita仲High，餐廳提供超過70款Margarita，唔怕醉就嚟喇。
上碟色香味俱全
Tequila用龍舌蘭釀製，歷史最早可追溯至歐洲人發現新大陸之前幾個世紀。話說墨西哥當地嘅印第安人，曉用藍色龍舌蘭草（BlueAgave）球莖裏面嘅汁液發酵成酒；輾轉至1758年，開始用蒸餾方式製成今日嘅Tequila；到𠵱家，用龍舌蘭製成嘅酒多不勝數，從鮮製入瓶嘅白蘭度（Blanco）到放入木桶令酒味變醇嘅Anejo，總共約有136種。「Coyote」選擇用Tequila入饌，烈酒灌入大鑊即時火光熊熊，酒香四溢絕對睇得又食得，食物上碟賣相亦不俗，呢次仲唔係色香味俱全？
食客有Say
「最鍾意牛油魚柳，因為魚本身無乜味道，Tequila酒味特別出。」
「最Like牛油魚柳，喺香港未食過咁好食嘅魚柳，魚肉可以做到入口即溶。」
「青檸烤雞胸同羊奶芝士沙律唔錯，雞胸肉唔粗有青檸檬味，芝士口感豐富。」
搵食攻略
CoyoteBar&Grill（28612221）
地址︰灣仔駱克道114-120號地舖
營業時間：
星期日至四12:00nn-2:00am
星期五、六及假期前夕12:00nn-3:00am
交通：灣仔地鐵站A1出口
座位︰93個