亡命小巴一早已經成為香港交通工具嘅Icon，因為佢哋不分晝夜都會喺公路上跟其他車輛「比賽」，你揸部車慢啲都隨時俾佢哋「推住行」；哈，點知早兩日上網嗰陣，見到網友CF4_Parkco喺《香港討論區》嘅《原來𠵱家啲小巴咁勁！！》Topic中，貼咗一條Link出嚟，八卦Click入去睇吓，原來係另一位網友用一部遙控小巴拍咗條片，用嚟展示香港亡命小巴嘅威力；其中最好笑嘅，就係用呢部遙控小巴甩尾泊位，跟住仲要搵部遙控林寶同部小巴鬥快，結果係點？小巴贏囉！
雖然喺現實世界中呢啲情況根本無可能發生，但睇完呢條片之後又真係笑到碌地，好似網友failong回應話：「超搞笑吖……尤其佢泊位嗰度」，又或者好似網友magic_johnson咁講：「好，等我聽日就去玩具街睇睇先……又識着燈，又快過林寶，唔買唔得啦，唔知貴唔貴呢？？」弊，搞到我都有啲衝動想去買部返公司，學吓人哋做亡命小巴司機㖭！
記者：鄭達基
討論網址： http://www7.discuss.com.hk/viewthread.php?tid=2198851&extra=page%3D3&page=1