PSP版重頭大作《RidgeRacer2》（下簡RR2）如箭在弦，呢個月14號就推出，機迷磨拳擦掌準備再瘋狂煲Game，鬥快攻下史上最多嘅42條賽道、過百場賽事！家用版亦唔執輸，最新嘅《RR7》再次成為新機護航作，暫時可算係11月PS3誕生嘅最矚目作。
記者：徐影龍
大佛＋中文招牌
到今年洛杉磯E3為止，《RR7》都只得影片齋睇，不過到9月22日舉行嘅東京遊戲展（TGS），便已確定有實Game供現場試玩。從官方最新發布圖片中，已清楚見到幾個場景都跟大中華有關，首先係細緻到爆嘅樹蔭賽道，茂盛樹林加石板貼圖均像真度高，遠望仲見到好有「樂山大佛」影子嘅巨大石像！
另一幅圖片可見到滿街中文招牌，由「生菜商店」到「廣東菜」都有，肯定係玩華人社區Feel，不過背景設計認真麻麻，點睇都似深圳工業區，跟令人津津樂道嘅《GT4》尖嘴賽道差太遠！
終加入改車系統
講番隻Game新元素，唔計Online模式嗰堆挑戰賽，較令筆者感興趣嘅，係終於加入改車系統，由引擎、避震、車胎到追加性能等等，組合數目超過七千種配搭，真係Tune車都有排玩，唔再一味靠「儲Nitros」衝線咁單調；加埋今集連車身外觀都可改，如霧燈、包圍等，合共30幾萬種車身組合，真係車內車外都玩得一餐，勝過XB360版《RR6》換吓顏色咁普通！