大學生真係好鍾意幫襯大牌檔，城大電腦系2年級生Pakho話：「Tea呢，多數去又一城搞掂，晚飯呢，南山邨先至係我哋首選。」南山邨係舊式公屋，屋邨商場平台仲有好多舊式食肆檔口，其中一間『樹記』就係佢心水推介，「係師兄帶我嚟嘅，佢哋話呢度抵食又好味。我同同學每個月最少幫襯一次，通常夜晚十點幾開完會，傾完Project就過嚟呢度開餐。」望吓門口，貼滿過往雜誌嘅介紹報道，噓！原來許志安讀城大嗰陣都幫襯過，老闆娘話：「我哋做城大學生生意做咗13年㗎喇，城大學生餐好平㗎，12位用套餐可以點13個小菜，有湯有飯，每位收$38，仲有外賣服務，可以送去學校或者宿舍。」有外賣服務當然方便，不過Pakho就覺得坐大牌檔先過癮：「舊式屋邨大牌檔，叫外賣返宿舍食就無晒癮，對住個牛角扇食小炒先夠地道風味嘛。」言談間老闆娘捧出幾道撚手小菜，見Pakho食得咁津津有味，我都唔執輸，整番件西檸雞隊番杯啤酒先，嗚，正呀。
記者：黃若茵 攝影：周旭文
西檸雞$38
Pakho：「我好鍾意呢味西檸雞，個芡汁恰到好處，唔會太酸，甜甜哋好易入口，雞肉炸過之後唔會變得亁爭爭，正。」
西蘭花炒花枝$38
Pakho：「炒花枝算係一道比較清淡嘅小菜，花枝片爽滑唔覺韌，唔會落太多調味料，食到原汁原味。」
醬爆豬頸肉$38
Pakho：「嗱，呢味就夠晒香口呀，豬頸肉好鬼爽口㗎！味道就辣辣哋，每次食親呢道餸都一定要飲啤酒㗎。」
樹記（27773684）
地址：石硤尾南山邨南山廣場2樓平台C4熟食檔