食法國餐一定要飲紅酒白酒？No囉，總廚Richard係荷蘭人，偏偏勁鍾意中國茶，佢創作嘅TeaDinner，用6種極品中國茶配5道法國菜，中西合璧非常創新。不過創新還創新，味道得唔得先？我講無說服力，搵「明茶房」（MINGCHA）茶葉品牌創辦人Leo評一評，見佢一啖中茶一啖西餐，每啖都有新驚喜，姑且又聽吓佢點講。
記者：黃若茵 攝影：何家亮
嗚謝：MINGCHA（www.mingcha.com.hk〉
歎茶要信自己感覺
Leo評「Amber」嘅TeaDinner，試味不知試得幾興奮：「任何食物都會愈食愈無味，杯茶幾濃都好，飲得太多都會變得無味，用中國茶配食物，難就難在兩者味道要平衡之餘，仲要做到互相提升嘅功效。」好玄喎，講白啲得唔得？「即係話食一啖食物，可以令茶味更突出；飲一啖茶，亦可以帶起食物味道。呢個餐做得好好，菜同茶配搭得宜。」我少飲中國茶，好難感受到喎，「飲茶要信自己嘅感覺，初初飲茶要盡量令自己有深刻一啲嘅感覺。」哦──依然係好玄，我嘗試嗒真啲喇，唔，每食一啖食物再飲相配嘅中國茶，味蕾的確有新感受，我諗呢啲就係Leo所講嘅配搭得宜嘞。
朱古力甜品最難配
大廚Richard係荷蘭人，煮法國菜掂，中國茶都難佢唔到，自從兩年前嚟香港，佢就經常歎茶：「茶同食物味道一定唔可以處於互相競爭嘅位置，我揀茶而唔揀酒配菜，係因為酒太刺激，而茶就有令味覺清醒嘅效果，只要配搭得好，口感一流。」佢認預備今次TeaDinner有難度：「最難處理係甜品，配外國茶唔難，配中國茶就好有難度，最後我發覺用64%可可去做朱古力蛋糕，配濃烈嘅普洱就最無得彈。」連可可嘅百分比都咁重視，呢餐絕對食到Richard嘅誠意。講明先，歎得呢個TeaDinner就唔該順住以上次序嚟食，否則會錯失茶同食物帶畀味蕾高潮迭起嘅感覺㗎。
1.澳洲龍蝦伴摩洛哥米配嫩甘笋及香料
Richard配製嘅摩洛哥香料有36種之多，龍蝦肉微辣中夠清淡，伴碟法國幼甘笋用橙汁浸製，加強前菜清新開胃感覺。Leo：「開餐飲鳳凰單欉好合適，一來呢隻茶有幫助消化作用，令人有肚餓感覺；二來味道唔霸道，唔會蓋過龍蝦鮮味。先飲一啖茶，食完龍蝦之後再飲，會覺得茶嘅甘味更重。」
2.油浸海鱒伴檸檬牛油及意大利飯配田園香草沙律燒雞汁
海鱒用48℃低溫煮熟，好嫩滑。意大利飯一樣有驚喜，以檸檬牛油伴飯一改意大利飯膩口之感。面層一片焗至薄脆嘅魚皮，係整道菜嘅完美點綴。Leo：「𠵱家市面賣嘅龍井味道單薄，呢度嘅龍井餘韻特別長。細嘗茶味，飲得出龍井帶少少魚味，不過龍井唔好飲太多，2至3杯已經好Full㗎喇。」
3.烚牛臉頰伴溶鴨肝、金菇、嫩韭葱、蘿蔔配黑菘露菌及牛尾茶
Richard：「本來我揀煎鴨肝雲吞做呢道菜，不過煎過嘅鴨肝味道太霸道，牛臉頰配鴨肝口感好得多，而牛尾茶就係一個清湯。」Leo：「2004年武夷紅袍得過廈門『世界茶葉博覽會金獎』，茶味強烈帶酸，配肉類味道更清雅，有消除油膩效果。我建議食完之前嘅海鱒先飲一杯武夷紅袍，清一清味蕾再試呢個菜。」
4.九曲紅梅啫喱配黑胡椒糖漿及紅茶雪葩
TeaDinner唯一一道用茶葉去煮嘅菜式，雪葩跟啫喱味道同樣清幽，作為甜品前序，有助清洗食物留喺舌頭嘅餘香。Leo：「安排呢個前序好醒目，如果直接跳到甜品，似乎快過頭好難嗒真個味。𠵱家好難搵到九曲紅梅，佢其實係次一等嘅龍井茶葉，但利用特別技巧可以做成特級紅茶，味厚香甜。」
5.薄脆果仁雪糕伴64%可可軟心朱古力蛋糕
Richard：「用64%可可最平衡到朱古力味道，成道甜品除咗軟心蛋糕，仲有果仁雪糕同朱古力條，唔會單調。」Leo：「普洱可以稱為茶界嘅Expresso，非常醇厚，佢嘅順滑甜味同朱古力好夾，而且有暖胃同幫助睡眠功效。」
6.感德鐵觀音
Leo：「估唔到最後仲有鐵觀音做Roundup，唔會食完就走人，係個唔錯嘅總結。飲完普洱再飲鐵觀音會好舒服，有助解渴、入睡，仔細飲可以Feel到有陣蘭花味，好正！」
睇埋裝修
Amber（21320066）
地址：中環皇后大道中15號置地文華東方酒店7樓
營業時間：6:30am-10:30am，12:00nn-2:30pm，6:00pm-10:30pm
交通：中環地鐵站G出口 座位：70個
人均消費：早餐$200，午市$400，晚市$800-$1,000
有着數：美國運通卡簽賬可獲9折優惠
最好賣：芝麻油吞拿魚沙律配烤香脆雞皮，日賣10份
註：TeaDinner每位$880，每晚只會提供20份，供應期至9月尾