為搵食，Natalie的老公揀農夫車也不買有型的四驅越野車，起初她有點埋怨，誰知老公買回來的三菱Triton，唔係樣笨笨，相反有時代感，直望好似SUV，車廂同Pajero一樣咁舒服，加上用柴油，仲慳到唔少油錢。「邊個話Pick-up（農夫車）係男人車？好，星期六、日我要善用佢，發揮農夫車無窮無盡的用途，曬太陽、觀星、掃平貨、甚至「車上Cafe」，與三五知己去山頂談天說地，一架車，多用途，抵番晒！
記者：陸伊琳 攝影：林栢鈞
協力：鄭達基
農夫車尋歡計劃
1.山野水着曬太陽 自成一隅
「沙灘太多人了，搵個靜靜哋地方曬太陽先！」
「上山下海最緊要係夠力水，油渣引擎出名低扭力好，幾斜都唔怕。」
「個車斗可以放好多嘢，沙灘用品、浮床，如果改變主意去沙灘玩都有得用。」
「Elaine，你都出嚟一齊曬喇。」
「唔好喇，我粗身大細都係喺車廂涼吓，你自己曬得開心啲喇！張座椅都算幾闊，好舒服，我就瞓着喇。」
「曬完回家，補番個妝先，塊倒後鏡都幾大，啱晒用！」
2.山頂變酒吧夠寫意
「搞搞新意思，約個朋友上大帽山飲嘢傾女人經，乜山頂有酒吧咩？有架Triton就搞掂！」
「5前速手波、四驅、2,477c.c.，有成144匹馬力，邊度都去到。」
「出色嘅四驅，唔理乜爛路，搵啱個位就泊車。」
無人打擾，摸住杯底談談心。「下次你結婚周年，我借架車畀你同你老公上嚟曬月光浪漫喇，如此美景，賞心樂事，心情舒暢。」
玩到High咗……
「Natalie你飲大咗，唔好揸車喇，都係等我開車送番你落去。」
3.有「大斗」掃特價貨
「嘩，後座位雖大，但已塞滿晒嘢，仲Shopping？夠唔夠位放㗎？」
「你唔記得咗後有個大尾斗，我諗呢一刻老公會後悔買了架農夫車，因為方便了我呢個購物狂老婆，買得仲放肆。」
「傢俬大減價唔包免費送貨，唔緊要，農夫車後面有個有坑紋尾斗，就算大大件的貨，我自己一樣可以運番回家。」
三菱Triton2.5規格
引擎：2,477c.c.直4柴油Turbo
馬力：144ps/4,000rpm
扭力：32.8kgm/2,000rpm
傳動：5前速手波，四驅
售價：待定
查詢：環宇汽車（24119511）
結論
女人揸農夫車仲有型
農夫車有如此多用途，證明女人用Pick-up都一樣咁有型，佢比一般私家車載貨量多，揸落好似一般的SUV，而且比傳統的柴油車靜，又夠力，座位闊落，班腌尖的太太們坐了之後都話舒服。據我所知，車價可能約25萬，都幾合理，只嫌後面個斗沒有蓋，載貨時感覺無咁安全，不過唔使驚，原廠應該有類似嘅配件。
