恤衫領呔　剛陽靠Smoky

近期時下好多女星都喜歡搞搞新意思，以中性打扮示人，好似容祖兒、官恩娜、薛凱琪等，亦曾打呔反串，就連一眾國際時裝品牌如D&G、DSQUARED等亦以西裝、馬褲、恤衫和領帶上陣出show，就知中性服係今年嘅潮爆打扮。蠢蠢欲動想玩埋一份？冇難度，只要配合化妝髮型，咁要點型都得啦！
記者：陳穎欣
攝影：譚盈傑、周旭文
Hair&make-up：Yan
Model：Karina@GrandeeModel

CHANEL帶起中性潮

講起中性打扮，就不能不提到20年代抬頭嘅女權主義。CHANEL就係以男裝布料製作女裝的始祖，帶起時尚界中性風潮，如着馬褲、戴帽等。從社會文化層面睇，中性風潮乃挑戰權威嘅結果，隨着人類追求自由和個性化，反抗權威專制的父權社會傳統和世俗束縛，於當時充滿離經叛道的意味。如今，中性裝扮已經演變成女性硬朗有主見的表徵。

■荷李活女星MarleneDietrich於30年代着上西裝打領帶，使中性潮流展現無窮魅力。

■薛凱琪示範中性中帶點稚氣。

■容祖兒於一輯月餅廣告中，亦以一身中性服高帽示人。

■官恩娜在宣傳歌曲《美麗革命》時，亦作男性打扮。

型格煙熏眼

「型」係潮人誓死追求的境界，秋冬要型，smokyeyes就係不二之選。今季唔只流行傳統黑色煙熏眼，仲可以配搭深紫、深藍或孔雀綠等顏色，造出豐富層次感。畫smokyeyes記得要畫粗黑眼線，再用掃blend開；唔想個樣太兇，可以用淡粉紅色胭脂及唇膏平衡整體感覺。

妝前

完成

妝容

1.上好粉底和碎粉，於眼簾位塗紫色眼影。

2.沿眼皮邊緣畫粗黑眼線，再掃開，營造smokyeyes效果。

3.顴骨位斜掃上淡粉紅胭脂。

4.塗上珍珠粉紅色唇膏。

髮型

1.將頭髮束馬尾。用髮泥把頭頂部份碎髮撥亂，並輕扭髮端，使頭髮豎起。

2.用髮夾將兩旁碎髮夾好。

妝物推介

LUNASOL淡粉紅色胭脂$340

LUNASOL四色眼影套裝$350

LUNASOL珍珠粉紅色唇膏$210

■Smokyeyes可勾畫眼部輪廓，深受美容時裝界追捧。

■紅妝亦係秋冬大熱，但用紅色作smokyeyes就未必人人carry到。

金光意氣軒昂

金色係秋冬另一熱爆顏色，適宜配襯earthtone色系。此妝粉底必須貼薄，是以液體粉底效果會較膏狀理想。眼部化妝係重點，眉毛唔可以幼，而且應由鼻樑位開始畫；胭脂唇膏則要nude及mat，切忌glossy，亦可薄搽一層遮瑕膏代替，咁就唔會破壞整體硬朗感覺。怕着西裝加啡金色太man，可改用粉紅、粉紫、粉綠來中和英氣。