馬會賽馬事務執行總監應家柏向傳媒講咗一啲馬會會員數字，幾有趣。佢話七成四馬會會員、六成八馬主超過五十歲，七成八會員係非馬主，從不入馬場，上季馬會會員人數升咗6%，入場會員人數下跌20%，情況令人擔心。呢啲數字顯示，大多數人入馬會只係想以會員資格威一威，對賽馬其實冇興趣，既唔想做馬主，亦冇興趣入馬場。
馬會會員年紀偏老，有其結構性原因。想做全費會員，要由遴選會員提名，每位遴選會員每季只得一個推薦名額，好矜貴，非好有關係人士，唔會推薦，大概係由至愛親朋一路排隊至商業夥伴，真真正正親疏有別。二十五萬元入會費，濕碎啦，唔知幾多人畀得起，但入會託人提名之人情，大到無倫，你話係唔係年紀大啲嘅人先至攞得到呢？
所謂物以類聚，唔喜歡養馬之遴選會員可能大多數嘅至愛親朋都係少入馬場嘅，呢批「非賽馬遴選會員」點會幫到馬會手吖。一位資深遴選會員對馬主Ｈ講，佢仔細睇過二百位遴選會員名單，覺得有起碼六成，係極少入場，唔多喜歡賽馬嘅人士，呢批人又以政府高官（局長、秘書長、署長）為多，佢好質疑點解馬會董事鍾意選高官做遴選會員，呢班人鍾意到馬會會所食飯游水啫，做乜要選佢哋為遴選會員？凡關乎馬會利益，向政府爭取，呢班高官遴選會員就會扮晒中立，話有利益衝突，唔會幫馬會出聲，如果真係利益衝突，所有政府官員都唔應該成為馬會遴選會員。
馬會新人上任做主席（佢亦係高官出身），應該改變一下會員入會準則，例如凡能夠顯示賽馬興趣（例如父母係馬主，自己經常入場，或係熱心奧運馬術）者，可以加十分，年青嘅（三十歲以下），又可以加十分，由極少入場嘅遴選會員推薦嘅，減十分，以後選遴選會員必先要核對佢過去十年嘅入場紀錄及有冇做過馬主，高官冇優待。用咁嘅方法，幾年內必見成效。