《FinalFantasy3》列入經典是鐵一般事實，大家不期然聯想到以此為主題嘅NDSLite限量版也必成玩家收藏恩物，不少遊戲店也大手入貨，不過呢款「同梱版主機」後勁就麻麻喇。
不只在香港，據聞就連日本也有不少《FF3》限量版主機「蟹民」，其一係近排太多唔同嘅特別版同新顏色NDSLite，另加上NDSLite推出日子尚淺，機迷再換一部嘅可能性太低，所以市面嘅《FF3》限量版主機，由高峯期炒上二千八蚊，跌到現時約二千一蚊左右。在不少拍賣網站甚至可以低於二千蚊投到全新貨品！
從《FF3》限量版主機事件中，大家似乎真是要好好諗吓，究竟特別版主機的存在價值是甚麼呢？
《SaintsRow》賣斷市！
不論坊間對《GTA》有甚麼評價，這類遊戲確實有着一定程度受歡迎，而玩法與《GTA》相似的XB360遊戲《SaintsRow》，一推出市場便賣個滿堂紅，而且更出現斷市情況。
其實自從上一隻《GTA》作品推出後，已有一段時間沒有類似作品推出，一眾支持者「餓Game」已久，《SaintsRow》一推出便爭相搶購，再加上對應網絡上12人對戰，更加令一眾XB360機迷為之瘋狂！雖然行貨價賣$299，但因供不應求，亦曾被炒至三百多元。
PSP新機推出在即？
早前，盛傳PSP將推出第二代新型號，但美國有關方面迅即表示不會推出新版本PSP主機。但據一間國內承辦PSP生產的工廠透露，舊版PSP主機已全線停產，意味新的PSP主機已經如箭在弦，然而在這階段，新PSP主機會作甚麼改動仍是未知之數，不過，依估計最大改變將會在內置記憶體方面，當然，PSP實際的動向始終要待SONY的公布才能作實。
另一方面，PS3發售在即，所以PS2亦展開最後的減價攻勢。據探子回報，喺年尾度便有新一波減價出現，大膽預測會冧至八百多元。消息屬實嘅話，又真係幾抵喎。
文：打機鐵人