呢期政圈繼續淡靜，不過唔使驚，唔會靜好耐，因為下個禮拜一民建聯就拉大隊北上，連馬力都話跟埋去。兩日之後，富貴嘅自由黨亦去面聖。中聯辦做咗咁多工夫，聽講肯定有領導人肯招呼呢班阿哥阿姐。邊個？咁佢哋梗係最想見到大曾曾慶紅啦。
出發在即，有啲風吹出嚟話北京其實都唔係好滿意煲呔，對佢用人唯親，一派獨大有多少意見。咁民建聯同自由黨班人飛到上去，應該會袋住三幾份小報告向阿爺面陳利害。呢個說法，在左派圈子傳得尤其盛，但依八方睇，在選委會插旗之際，中央一定會力挺煲呔到底。你話大曾企出嚟會講乜？梗係叫大家和諧穩定啦；今次大鑼大鼓做大騷，篤背脊又點會咁揚呢。
中央明挺，但地方諸侯就愈嚟愈唔畀面。呢一點，煲呔呢邊應該要小心處理，有時淨係去拜土地，亦未必擺得平。嗱，八方抄段嘢畀各位睇睇。
「粵港聯席會議已經開到了第九屆……但曾蔭權到達廣東後幾乎只說了一句話：這次會議，我們只談環保。粵港合作，在邁入第十年的門檻上，方向依然清晰，都無法疾步前行。」
埋怨只係識攞着數
呢段嘢，點晒名批煲呔，但唔係八方呢亭反動派所為，而係出自「廣州日報集團」旗下，在內地極有地位嘅《南風窗》半月刊最新一期嘅鴻文。呢篇文充份反映粵港兩地嘅深層次矛盾，唔信，再睇多段。
「廣東在通過各種手段逼迫香港那些重污染企業搬遷。而香港，不停地埋怨廣東人污染了香港的空氣，最宏大的夢想是希望律師能去廣東打官司，希望廣東的小企業能來香港上市，希望廣東人都來全世界最小的迪斯尼（迪士尼）遊玩。」
話說上月2日，曾特首帶住35位高官北上廣州開第九次粵港合作聯席會議。之前，佢特意去參觀沙角電廠的脫琉工程。咁就擺到明玩嘢啦，看在張書記黃省長眼裏，唔火就假。至於話內地嘅言論代唔代表官方？你話呢？八方記得回歸初期，全國各省市自治區嘅領導冇一個准對特區指手畫腳，莫講話區區一本半月刊。
煲呔咁醒目，應該知點做。好似最近委任吳光正做貿發局主席，就畀大家知道佢容人有量啦。遲吓拉大隊去湖南，睇嚟一定唔會去睇人啲魚場雞場豬場咁惹火啦。