早前有人話劉家昌侵吞國民黨黨產超過六億台幣（即約1.4億港幣），所以佢面臨被台灣通緝，劉家昌就曾經發聲明話係六年前嘅新聞炒作。噚日劉家昌去銅鑼灣出席「保良之歌公布儀式」，再被問及呢件事，佢一聽到就好勞氣，用國語話唔希望同政治拉上任何關係，而且佢一直都係反對台獨，因為佢唔忍心見到中華民族分裂云云。
劉家昌話國民黨都係唔主張台獨，所以比較接受佢嘅意思，但係經過呢件事之後就唔會幫任何一方，如果自己做咗犯法嘅事早就俾人拉咗去坐監。
之後劉家昌又話咁耐以嚟都冇人請佢返去聆訊，佢仲話之前喺香港做演唱會，有唔少本地同台灣傳媒去過佢屋企，所以唔應該用搵唔到佢嚟做藉口，如果真係有人搵過佢，就可以話佢唔去接受聆訊，但係從來冇人搵過佢，所以就唔應該咁講。