馮仁昭四圍超:安仔消夜谷腩襯肥杏

馮仁昭四圍超:安仔消夜谷腩襯肥杏

許志安啱啱同肥杏胡杏兒拍攝無綫劇集《肥田囍事》,為咗襯得起肥杏,安仔除咗裝假肚之外都要增磅,唔覺唔覺就做咗大胃王。噚日凌晨時分,馮仁昭就撞見佢拖埋老友蘇永康、張達明、谷德昭、唱片監製陳光榮同歐陽德勛等等,拉大隊去尖沙嘴富瑤海鮮酒家開枱食大鑊飯。

康仔變交通燈

食飽飽之後,大約喺凌晨點零鐘左右,只見安仔一支箭咁由酒家走出嚟,迅速竄上佢嗰架價值約160萬嘅黑色平治SL55跑車。雖則呢部車已經落地兩年,但安仔平日十居其九都係由保母車接送,好少揸車,如果唔係親眼見到佢揸車,差啲唔記得安仔都係有牌之人㖭。
過咗10分鐘,谷德昭同張達明都先後散band,之後輪到歐陽德勛都同女友蔡立,中間夾住個電燈膽蘇永康壓軸離場。由於已經半夜三更,加上康仔着到五顏六色,戴白框眼鏡、綠黃橫間Tee兼配橙波鞋,成盞交通燈咁款,好鬼搶眼。佢警覺力超高,人向前行,個頭就向後望,即時發現街頭有記者,之後佢就揸住部四驅車帶記者遊花園,睇嚟康仔都得閒得好緊要喎。

電燈膽蘇永康(中)同老友歐陽德勛(左)同佢女友蔡立(右)離開食肆時,即刻高度戒備,不時回頭望。

安仔同胡杏兒喺劇集《肥田囍事》裏面有肥人終成眷屬。
資料圖片