電視台女星嘅手機換衫短片俾人勒索，噚日全城議論紛紛，猛估邊個女星咁唔好彩。八方反而諗起八、九十年代轟動娛樂圈嘅字母小姐騙案。當時騙財又騙色嘅錢志明，聽聞出獄後改行做的士司機。八方聽聞，呢位仁兄當年被捕後由審訊直至坐監，都死性不改，不斷向身邊嘅被告同懲教人員攞着數。
八方聽聞，當年錢志明去到法庭接受審訊前，要喺一個地方同其他犯一齊等開庭。呢段時間各個被告都可以拎住自己單案嘅證供。錢生份證供裏面，附帶咗唔少字母小姐嘅香艷照片。據聞錢生唔放過任何機會，只要邊個被告畀煙佢，就可以睇到呢批艷照。
直至錢志明要坐監，愛拎着數嘅性格依然冇改，就算排隊攞飯，都會要求阿sir畀粒喉糖過佢。當年監獄一早迫爆，一餐飯都要分三批安排囚犯去食，班阿sir邊得閒招呼呢個麻煩友，一見到佢又想攞着數，就即刻叫佢行開。