今季英超3位南韓球員，率先「彈出」嘅竟然係薛琦鉉；雷丁周三宣布，呢位南韓外援以超過一半選票，當選球會8月份最佳球員，替亞洲爭光。薛琦鉉第一季打英超，就得到雷丁球迷支持，認真可喜可賀。
薛琦鉉8月份3場英超全部正選上陣，雖然冇入波不過就交出兩個助攻；而且薛琦鉉爛打唔偷懶嘅打法，更得到雷丁球迷歡心；呢位27歲前鋒，喺官方網站嘅球迷投票中，取得51.2%票數，中場薛維爾只得12.7%嘅票數，取得遠遠落後嘅第2位，第3位就係得票8.8%嘅後衞索尼。
長遠計較朴李有前途
講真，薛琦鉉喺國家隊或球會嘅名氣，都及唔上效力曼聯嘅朴智星、同效力熱刺嘅李榮杓，甚至喺球會實力上，曼聯同熱刺亦遠比雷丁好。不過睇番朴智星，因為隊友傑斯同基斯坦奴朗拿度大勇，故只得1次正選上陣機會；李榮杓雖然喺熱刺上陣次數甚多，不過早前幾乎成為交換前鋒美度嘅條件之一，又有占邦達加盟爭位，前途未必有薛琦鉉咁好。
唔好話求大俠「長他人志氣，滅自己威風」；其實英超都有我哋同胞，可惜中場李鐵繼續傷患纏身，今季都未代表過錫菲聯上陣。眼見南韓球員都可以喺英超發光發熱，我哋中華民族點可以失威，加油呀鐵爺！
睇見薛琦鉉可以喺雷丁深得球迷歡心，當然同屬亞洲人，都與有榮焉；不過我哋中國人唔會咁易認輸，希望李鐵可以幫我哋爭番一口氣啦。