律政司司長黃仁龍噚日挨晚出席「香港法律學生──暑期內地實習2006北京及上海」結業典禮，佢語重心長同43名港大同科大同學講，要學好英文。原來有一次，一個由內地來港觀摩學習嘅內地法律學生同佢反映，佢到過香港嘅法庭聽審，發覺啲律師同法官嘅英文都唔係咁好，有啲失望。仁龍哥對呢件事耿耿於懷，所以要提醒啲香港同學，大陸嘅學生英文突飛猛進，將來嘅競爭會好劇烈。
呢項內地實習嘅活動係由法律教育信託基金主辦，得到清華大學法學院嘅支持，基金會主席陳小玲話希望六個星期嘅實習可以擴闊同學嘅視野，日後學以致用，為中港兩地法律界作出貢獻。身為基金贊助人嘅終審法院首席法官李國能以及基金會嘅顧問陳文敏都有出席結業禮。