香港長期受英國殖民統治，港人對國家身份嘅認同及認知，始終都係唔深，例如十個有九個都會話自己係香港人，唔會話自己係中國人。問佢哋五星紅旗上啲星有咩意思？大家都係耍手擰頭。
范太同葉太呢兩位左派女紅人，對此當然好似好感歎，噚日佢哋出席一個論壇，更加暗示政府無帶頭做好，話好多駐外辦事處無掛國旗，唔知係唔識掛抑或唔想掛喇。究竟怕人哋有藉口話佢哋做洗腦工作，定係因為五星旗喺國際間印象麻麻呢？
葉太就爆料話回歸之後，紀律部隊中有人殉職要蓋國旗，好多成員都要特別跑去駐港解放軍嗰度學摺國旗，證明唔係隨隨便便就搞掂。總之，要搞國民教育，政府一定要以身作則喎；但啲國民受唔受呢？