孫興早前偕女星林依晨來港為亞視宣傳新劇，上周五聯同曾志偉的女兒曾寶儀齊到又一城一間越南餐廳歎下午茶，埋單才400多元，但當時眾人吃完便離開，無人付錢。事後孫興解釋謂亞視包辦他整個來港行程，理應由亞視支付，亞視卻指這是孫興的私人活動，與他們無關。
孫興近年全力在內地和台灣拍劇，上周五他和台灣女星林依晨來港，宣傳亞視外購劇《天外飛仙》和《糊塗王爺鐵將軍》。記者會後兩人會合曾志偉的女兒曾寶儀，一行八人到了又一城溜冰場對面的越南新味餐廳吃下午茶，但眾人用膳後竟「拍拍籮柚」便離開，沒有人付錢，公然吃霸王餐。
侍應追畀錢
據知情人士透露，當日孫興等人約3時許抵達餐廳，其間孫興不停抽水煙，曾寶儀也抽了一口。之後眾人點了幾碗湯粉和小吃，還有三客雪糕，盛惠約400多元。約5時許，一行人吃飽飽就離開，當餐廳侍應追出去，找眾人付錢時，他們已失去蹤影。
記者前日就此事致電身在北京的孫興，他說：「我哋呢次嚟香港嘅行程全部係亞視包辦，當日食嘢都有亞視嘅工作人員喺現場，所以我根本冇為意要埋單，走嘅時候服務員仲不停同我哋講多謝，我哋好慢咁行落二樓走，又唔見有人追出嚟。」
孫興續說：「成件事都幾搞笑，之後我同亞視傾過電話，佢話宣傳活動完咗，食嘢費用要我哋自己畀，畀真係唔係問題，但話畀我哋聽吖嘛！哈，活動一完就要自己畀錢喎！我唔知亞視之後有冇落去埋單，如果佢哋幫我畀咗，我遲啲返香港畀番錢佢哋囉！」
亞視公關部區先生昨日接受電話訪問時說：「其實當日活動完咗之後，係孫興話想行又一城，咁我哋安排咗部車同埋同事送佢哋去，都唔知佢哋冇埋單。孫興今次嚟嘅費用全部係亞視負責，但呢個係佢自己嘅活動，不過我哋都會搵番間舖頭畀番錢，當一盡地主之誼。」
採訪：張止寒
